好多人問新一屆政府管治香港會係點樣？其實唔使等7月1號，而家都知道七七八八。
來屆管治風格將會係一條親中民粹主義路線，似工聯會，以五司十四局重組處理手法可見端倪。
CY走親中民粹路線
重組政府架構本質上係一個政治問題，在振英處理下變了一個民生議題，佢一開始就希望用民意來壓政黨、傳媒及立會，而非以理服人。運用技巧將重組與民生施政綑綁，不斷表示7.1前無法完成，土地房屋等民生施政將大受影響。民粹特色是討好群眾，施政不以政策理性為先，因此造成了群眾與精英階層之間對立。馬嶽及陳方安生公開質疑重組推銷手法，就係代表一種精英立場，馬嶽認為振英欠邏輯，自相矛盾，既然佢講到咁大件事，關乎民生福祉，點解唔向公眾諮詢。陳太則認為政府有一套運作體制，房屋土地供應在於政策，同重組無關。
政務官是政策理性的代表人物，多年來扮演一個溫和、務實的中間人角色，平衡階級及政治集團之間的利益矛盾，所秉持是一套程序公義及政策理性。自91年民主化起步，政務官一直是穩定政局的力量，將政治鬥爭的影響減低，建立共識，阻止社會陷入無休止政爭之中。但半桶水民主化不斷削弱政務官地位及權威，一批又一批權力新貴進駐政府總部，指指點點。政務官在政治上不斷後退，但新的管治權威卻無法確立。
備受學者中產質疑
振英重組備受學者挑戰：「你政綱有香港人授權咩？」無經過巿民投票，所謂「蹉跎歲月」的指控，也無民意基礎，得唔到精英認同。當然，佢可以再去東涌、天水圍，又搵何喜華搵劏房戶，哭訴住屋難，甚或指控阻礙重組之泛民黨派，不理民間死活。但呢種低水平民粹Show，只會更進一步令中產質疑：「係真唔係呀！」
在2017普選計算下，未來香港必然會走上民粹之路，但係咪一定成功？我看未必。
添馬男