立法會議員為替補機制惡法，展開了「拉布戰」。我們一邊看電視一邊笑到死死吓。大家清楚種種非逼切性又削弱市民選舉權利的荒謬惡法，只能以「拉布」、「流會」這些無奈的方式去應付，實在是港人悲哀。而明明可以「休會待續」，建制派竟否決，不情不願地「輪更湊數」避免流會。
本來是悲哀，但觀猛男有備而戰，千幾項「修訂」侃侃而談又令人忍俊不禁。毓民引經據典既換普通話講課又溫家寶上身，煞有介事：「唔拉布唔知自己讀書少」，忽然聯想起有部電影《大丈夫》，宣傳句是「唔滾唔知身體好，唔賭唔知時運高」，那些尸位素餐平日又懶開會捱唔住的建制派叔伯，打瞌睡看書發呆寫毛筆字甚至「唔瞓唔知拉緊布」，長毛忽驚呼：「佢咁樣唔知有冇生命危險？……哦，醒番得嘞……救人如救火！」終於有人發火大罵：「全部瑣碎、無聊、無意義！」─原可安排優先處理其他議案不必悶死，但自己選擇自己承受吧。人家拉布也付出同等體力和腦力，並非如昨日的稿子：「站着說話不腰疼」。
總之大夥苦中作樂。