魯爾縱橫球壇近20年，兩年前黯然離開皇馬去史浩克04，人人以為佢去養老，點知繼續有貨賣。佢老人家一早宣佈咗會喺今季之後走人，而目的地亦終於揭盅，將會喺加盟中東卡塔爾球會艾薩德。魯爾同艾薩德只係會簽1年短約，呢支上年亞冠盃冠軍球隊喺下季只得本土賽事踢，不過咪以為去到可以嘆世界，嗰邊啲油王畀得咁多錢，自然要魯爾出番咁多力。
私人教練24小時實
卡塔爾球會艾薩德喺日前透過官網正式宣佈已經同魯爾達成協議，後者會喺12/13球季代表呢隊波披甲上陣，有傳年薪都有300至400萬歐元（約4,000萬港元）。艾薩德喺上年亞冠盃決賽擊敗全北汽車奪標，亦藉此參加年尾嘅世冠盃兼攞番個季軍。之不過艾薩德喺近兩季本土聯賽成績嘛嘛，10/11同啱啱完嘅11/12球季都爭唔到亞冠盃參賽資格，球會重金禮聘魯爾返嚟，目標自然係要喺12/13球季本土稱霸，再進軍2014年嘅亞冠盃。
大約十年前開始，唔少球星選擇喺職業生涯晚年過檔去中東球會，嗰邊畀得起高薪固然係重要原因。不過求大俠話你知，其實去到中東都唔係齋hea，已經退休嘅阿根廷傳奇射手巴迪斯圖達，喺03年都去咗卡塔爾搵食，效力咗艾阿拉比兩年，佢喺加盟後第一季表現好勁，18場入25球破晒當地紀錄。巴迪高事後講番，唔好諗住喺中東可以過紙醉金迷嘅生活，球會對於旗下球員管制好嚴格，就算你係球星都唔會例外，有私人教練專責24小時實你。
老金童去邊都掂
球會對魯爾肯定有期望，而我求大俠就相當睇好老金童過到去都會撈得掂。魯爾效力皇馬16年贏盡所有錦標咁滯，到32歲人球會唔要先轉投史浩克04，點知呢兩季表現絕對係老而彌堅，第一季帶領隊波打入歐聯4強，到今季就重返德甲前3位置攞到歐聯參賽資格，即使要走史浩克球迷都係鼓掌歡送。一把年紀仲係有心有力，魯爾去到水平相對低啲嘅卡塔爾聯賽，應該仲有作為，達到艾薩德啲油王老闆嘅要求。
知多啲
羅馬里奧踢過艾薩德
艾薩德被視為卡塔爾歷來最成功嘅球會，曾經紀錄性12次贏得本土聯賽冠軍，亦分別喺1989年同上年兩次喺亞冠盃封王。艾薩德有無限財力支持，歷來亦都吸引過唔少著名球星加盟，包括巴西名將羅馬里奧（左）、前法國國腳拿保夫同埋家踢緊國際米蘭嘅莫路沙拉迪。至於目前陣中嘅外援，除咗即將加盟嘅魯爾之外，仲有前年幫馬賽贏法甲冠軍嘅尼安、前鋒卡達基達同埋南韓國腳李正秀。
