中央政府高層權鬥不斷，外圍又亂過亂世佳人，呢啲時候就最多一啲唔知堅定流嘅報道失驚無神咁爆出嚟。上星期就有內地網站言之鑿鑿咁話中華煤氣（003）涉嫌賄賂武漢市前市長。煤氣上星期五晚即刻發聲明，話有關報道嚴重失實，已經立即交咗畀律師處理。
煤氣：賄賂新聞屬虛構
煤氣份聲明話，相關報道內容涉及虛構揑造資料，對主席兼大股東四叔李兆基同煤氣都構成誹謗，仲嚴重影響煤氣聲譽㖭。聲明強調，煤氣喺內地嘅投資、開拓、商談以至營運，全部都係奉公守法嘅，跟足晒相關法律法規做㗎。聲譽尤關，所以煤氣表明，會保留一切法律權利。
華華噚日就上番個內地網站睇有冇跟進報道，唔知個網站係咪已經收到律師信，已經冇咗煤氣單新聞，但又冇登番煤氣嘅澄清聲明喎，暫時估唔到佢哋想點。