政壇熱話「雲在青天，水在瓶」；球壇勢力有升有跌，強如巴塞也難傲視江湖，今季面臨無盃之厄。今次英超煞科按傳統照樣安排周日足本上演，上中下游同樣有嘢爭，大家表面似在磨拳擦掌；不過凡事沒強求，盡了力，收爐前打場好波畀擁躉睇已係做好本份，波友未宜過份熱情，只因莊家早盤已洞悉投注人心理，提防有得爭球隊連場熱倒。
曼城定曼聯 寧玩半場大
港迷寵慣，收費台今季照樣尾輪10場同時間全直播，世界走得快，佢哋現有客戶家就算喺街上，都有機會用手機透過佢哋嘅apps欣賞賽馬足球直播；小弟喺街試過，畫面清晰又唔多斷線，「畸寶」呢鋪贏番「現在」一次。
明天再唔怕母親節訂枱食尾輪8點半，趕唔切返歸睇300台播曼城，64台播利記。曼城迎昆仔開到[-2]預咗，佢哋只求贏波壓紅魔奪標，贏夠3粒唔係唔得，驚下半場收夠籌拉布等開香檳。
昆士柏流浪領隊曉士都想替舊波士費Sir做個順水人情，同替自己曾被曼城炒魷出番口氣；但要靠安東費迪南同奧奴夏呢類見晒底嘅土炮後衞博和護級成功，難矣，不如主動搶吓攻好過喇。呢排估半場入球幾順，就博吓兩軍加埋入到兩粒，開個1.88倍半場入球「大」！
至於曼聯作客到新特蘭，唔係太好賭，紅魔班波嗰心喺上場已見有異，副引擎去唔到turbo嘞，作客光明球場贏6、7粒都保證唔到捧盃，我就寧願調番轉諗估大冷和局。
3雄爭第3 不如揀粒糖
想當年熱淚盈眶！講緊係對上一次英格蘭頂級聯賽有機會以得失球分勝負嘅煞科戰，時為89年初夏，利記主場鬥阿仙奴，兵工廠要贏兩粒先靠得球較多，壓倒對手封王；不可能任務喺補時米高湯馬士入到2:0，當年仔個陣睇完啱啱天光，真係對住個電視機睇住捧盃，喊咗好耐先返學。往事只能回味，兵工廠正陷7年之癢嘅無盃歲月。
同意仙道彬兄所講，家呢隊八國聯軍嘅兵工廠冇以前咁齊心，明日仲有幸爭第3真係要拜競爭對手同樣咁水皮。阿仙奴要作客贏西布朗先穩奪第3踢到來屆歐聯，個W得1.55倍真係擁躉都買唔落手；死敵熱刺對神經刀富咸得1.31倍主W，莊家仲過份，哈帥做唔成英軍領隊又面對來季星散，敵對者心凉了，小心前熱刺、現任富咸領隊祖爾喺白鹿徑做世界，送多盤冷水畀哈佬。不過講信心，我寧取迎戰紐記嘅愛華頓少讓上盤，小弟成日好懷疑紐記想打歐洲賽嘅決心，班波今季攞到咁嘅成績，真係已對得住東北父老。
保頓有生氣 撞啱「篤」定hea
外界都預咗昆仔敗走曼城，小弟也認為保頓有機會作客打敗季尾例hea嘅史篤城，護級成功，何況個客W有近3倍，唔得咪當送佢哋一程。冇咗中堅韋達，保頓有更高嘅禮特嘜史篤城嘅長人中鋒高治，首循環主場送過對手5蛋，心理有優勢。史篤城4季前升班，季季埋單排中下游夠分算數，對上3季煞科戰不勝；睇吓傷癒復出嘅翼鋒李青龍，今場會唔會替保頓飛龍在天。
阿伯唔爭氣 韋咸防黑氣
說好了入決賽鬥韋斯咸嘅伯明翰落空，不幸言中，阿伯畀黑池兩位今屆越打越好嘅90後土炮殺手麥迪菲臘斯同湯馬士恩斯打垮，今季無緣回升，其中伯軍射手馬龍京治真係最黑嗰個，兩回合皆有中柱同食詐糊；總計4場附加賽，小弟貼士兩勝兩敗，唔多滿意。下周六碰巧呢場升班大戰，安排喺歐聯決賽前早幾粒鐘上演，真係好戲接住上，非今天主題，先刨好啲，留待下周與波友分享。
下次見報(19/5)
蘋果波神
英超煞科日心水
熱選：愛華頓（上）
副選：曼城半場入球大（1.88）
冷選：保頓勝（2.85）