帶小朋友出外，麻煩多多，偏偏親子旅遊專家Amanda不但愛帶小朋友出門，還喜歡帶她們出國。為了囡囡，景點改成動物園、主題樂園，裝備亦包羅萬有，曾撞板的她會帶足夠全程每日食用的藥物，聽見也感到辛苦。但Amanda說希望囡囡增廣見聞，見到她笑，一切都值得。母親，你們很偉大！
記者：姜穎妍
攝影：劉永發（部份相片由被訪者提供）
場地提供：花栗鼠寶堡（37499428）
地址：荃灣川龍街88號協和廣場3樓
Amanda'sProfile
曾於多間報紙雜誌工作，有逾10年經驗，擁有一子一女，是親子界的先驅。09年開創先河，撰寫了香港首本親子旅遊書《親親東京09-10》，其後的著作有《親親台北2011-12》，亦編輯了《親親新加坡2011-12》親子旅遊書，絕對是親子旅遊的專家。訪問當日Amanda帶同兩歲囡囡阡阡，提議去位於荃灣的兒童遊樂場花栗鼠寶堡，有多條滑梯、彈床等遊樂設施，阡阡玩得開心，我們又能拍攝得好相片。看見她介紹的好地方，便知道她對親子好去處非常熟悉。
日本台灣沙巴 七天旅程最正
對於新手父母，Amanda建議不要出遠門，「歐洲等地長途機對小朋友嚟講太辛苦，一旦出事，距離遠會好麻煩，最好飛行時間係三至四小時內，旅程七日內就夠。」亞洲是出遊首選，「亞洲親子配套最好，一定係日本，好多樂園同商場的育嬰室提供熱水冲奶。東京豐洲有體驗博物館Kidzania，畀3至15歲嘅小朋友體驗消防員及導遊等職業，部份更可穿上制服，非常有趣，仲有課程教小朋友整雪糕等食物。」
自311後，港人對旅日有所保留，Amanda推介台灣、新加坡及馬來西亞，「台北亦有類似嘅職業體驗博物館BabyBoss，價錢仲平。小朋友鍾意動物，見到大笨象、企鵝等兩眼會發光，可以去能擠牛奶嘅飛牛牧場、全台最大規模嘅臺灣市立動物園等，台灣嘅親子餐廳亦唔錯；新加坡就要去環球影城，除咗機動遊戲、波波池等，小朋友鍾意園內的卡通人物，阡阡錫了HelloKitty一啖，好開心。最好係有特別排隊服務，同工作人員講聲，媽咪玩完爹哋唔使再排就玩得；馬來西亞沙巴多靚Resort，打開露台就有游泳池，隨時玩隨時休息都得，好方便。」
囡囡發燒 日本撞大板
談起親子遊，頭頭是道，處處中Point，但原來成為專家前，Amanda有過慘痛經驗，她曾帶女兒往日本及新加坡等地方，歷練過後綜合經驗，方能寫出貼心書本。由於她熱愛旅遊，囡囡阡阡不足一歲，已忍不住帶她出門往京都自駕遊，誰知馬上撞大板，「去日本玩10日，打算由朝玩到晚，無留意小朋友會頂唔順，加上遇上突來的強風，火車停駛，被困三小時。日本暖氣好熱，出入時一凍一熱囡囡就病咗，傷風、咳、發燒。」阡阡沒有因病發脾氣，只皺起眉頭，望着阡阡痛苦的表情，Amanda心如刀割，「我有帶藥，但無諗過佢病咁多日，喺日本語言唔通，撲到醫院，醫院又唔肯收症。」
徬徨無助，輾轉溝通後，才明白日本醫療系統跟香港不同，「香港急症室乜症都收，但日本係小兒科先會同小朋友睇症，溝通唔到唔會睇。」幸好得到酒店幫助，小兒科醫院碰巧有中國繙譯，才順利找到醫生診治，診症費約$700，不算太昂貴，但教訓很大，「幾日唔敢瞓，晚晚睇住佢，想即刻買機票返香港，好彩吃咗藥有起色。」繼續行程，帶阡阡到去睇長頸鹿、鴕鳥等動物，「見到佢餵鹿個樣梗晒，擔心佢唔鍾意，原來係覺得又新奇又怕，哈！回程時笑到咭咭聲，個心即刻放鬆番，開心晒，幾辛苦都值得。」
Amanda給我相片，阡阡就在旁指手劃腳，重複嗌鹿鹿，向我解釋相片內容，相信小朋友的外出經歷很愉快。吸收經驗，Amanda建議出國一定要帶足夠藥物，五天遊就一定要帶足五天藥。行程不宜多，如去農場，一天遊一個景點已足夠，否則小朋友很易病倒。
帶小朋友出遊貼士
1.帶備足夠藥物
可到醫生處購買足夠整個行程食用的平安藥，「平安藥有齊退燒、咳、止嘔等藥。」另外亦要準備探熱針、蚊貼、防曬霜等，有備無患。
2.帶足夠奶粉及礦泉水
在外國奶粉不易購買，為免小朋友水土不服，最好寄艙帶四至五瓶礦泉水出國，每天逐少溝礦泉水及當地水給小朋友飲奶。
3.帶滴露消毒
大部份酒店浴缸都很高，最好是自備吹氣浴盤。否則可帶滴露，「小朋友喺屋企用慣盆仔冲凉，出到去唔慣用花灑，滴露可以用來消毒浴缸。」
4.小朋友不宜奔波
每天景點一至兩個已足夠，亦最好減少轉換酒店的次數，免去頻撲之苦。
5.攜電飯煲有備無患
小朋友未必鍾意食外國食物，帶定迷你電飯煲就可煮簡單食物。
後記
因工作關係，本身Amanda對旅遊已很熟悉，但為確保再次出遊順利，她不斷收集身旁家長朋友的意見、參考Blogger介紹、在網上親子論壇跟人討論，終成親子旅遊專家。「最初因工作需要，未有小朋友，已開始撰寫以親子旅遊為主題嘅文章。後來發現市面無旅遊書特別介紹親子遊，就的起心肝決定寫番本。」既熟悉外國，又有育兒經驗，憑着創新及貼身的內容，《親親東京09-10》甫出版便大賣，5,000本快速售罄。媽媽帶子女出門既要遷就行程，又需拿更多的行李，花費又大，為的只是要想看到囝囝囡囡開心一笑，這刻，我確切感到母愛的偉大。
