希望在明天，一日未開波你都唔可以話我冇機會，曼聯球迷係咁諗，英格蘭fans亦可以咁諗。新一期《442》封面大大隻字WhyEnglandWillWin，點解英格蘭會贏，夠大口氣嘞啩。唔好怪佢夜郎自大住，查實今期佢出夠4個封面，題目為點解德國會贏、點解荷蘭會贏同點解西班牙唔會贏！吓，西班牙個封面真係有個「Won't」字，夠膽睇死大熱門，都算有態度。
被睇淡 零壓力
曼聯今晚要等奇蹟，但起碼數字上仍有機，費格遜出口術之際，網友們亦大事創作各式各樣的可能賽果。英超就係咁要玩到最後一刻。話時話，香港波今年都係要鬥到尾吖。
揭開《442》偷吓師，發現「點解英格蘭會贏」一文，竟然啱晒所有實力被睇淡或無人留意的球隊，包括香港隊，甚至你嗰隊中坑業餘衞生波。
Nocaptain，冇隊長？泰利冇得做，謝四、林伯唔知有冇得踢，柏加年資又淺；但冇問題喎，唔信參考吓上屆世界盃的德國隊，臨陣冇咗波歷克，搵個靜雞雞但係必然會上陣的拿姆就掂，英格蘭邊個會係必然正選兼有排踢，門將赫特囉。
Nomanager，冇領隊？家有啦，鶴臣嘛，不過唔多得民心。冇緊要呀，你睇吓70年世界盃（咁耐世紀？）嘅巴西，薩加奴臨時拉伕咪又掂。嘩，咁都得？嗰時巴西有比利喎，你英格蘭呢？朗尼分分鐘踢一場咋。
準備不足，賽前風風雨雨令英格蘭備戰有限。唔怕，92年嗰屆丹麥10日前先收到通知頂上，咁就冠軍啦，點解？舒米高話因為零壓力，咁鶴臣要比班WAGs一齊去先得。
睇淡，高調的英格蘭終於被睇淡。《442》話仲好呀，你睇04年歐國盃，邊隊攞冠軍？希臘呀！嘩，足球發祥地都向奧運根源地致敬時，世界有點變了。嗱，就係望你世界變，咁奇蹟就有日會出現！
文：keyman