亞視呢排學人玩創新，二次創作嘅台慶歌已經俾網民狂轟，聽日母親節，亞視又拍咗條宣傳片，仲一反傳統從拜山嘅角度出發，真係大吉利是！唔知係咪真係咁邪，片段中嘅主角、亞視藝員蔡國威，拍完條片7日後，一向父兼母職嘅蔡爸爸因肝癌過身，蔡國威就將段片當作「母親節」禮物送畀喺天國嘅爸爸。
講番段片，蔡國威着黑西裝、白恤衫、戴黑色粗框眼鏡，攞住啲康乃馨，再擔把黑遮，好傷心咁行上山，又企喺山頭落淚獻花思念媽媽，蔡國威喺旁白度講：「媽，你成日教我對人要問心無愧，我做到喇，你睇唔睇到呀？媽，我最近得閒，可以早啲返屋企食飯，幫你按摩，你喺邊呀？我好掛住你呀。」雖然有子欲養而親不在嘅感覺，但母親節搞啲咁嘢就好怪囉。
當禮物送亡父
馮仁昭噚日打畀蔡國威問佢對段片有乜意見，佢話：「睇到個故事，我都嚇一跳，情況有啲似我同老竇嘅關係，我一出世，父母就離婚，10歲時見過阿媽一次。我哋喺5月1號拍呢段片，5月8號凌晨老竇離開咗我，睇嚟好似有啲邪門，但我將段片當禮物送畀佢。」本來條片仲有山墳、拜祭，同喺墳前撒母子合照嘅片段，但最後喺台前幕後要求下剪咗，已經減低咗傷感度，不過聽聞唔少亞視人都話段片好邪。