最近網絡上有位投資者發表致富史，由於過程相當傳奇，由8萬元起家，10年賺到500萬元，一時間令不少後生仔為之神往。
10年賺500萬元的例子，相信隨街都唔少，尤其在03年買樓者，有些人固然目光精準，但更多是儍有儍福，無意中買到好嘢，賺500萬元唔奇。近日爆紅的網絡炒樓自傳之所以吸引，因為本錢少至8萬元（很多人都有但唔曉點煲大佢），加上起家對象為分契劏房樓，又有一些慳佣奇招、篤爆衰經紀，令大家睇得有共鳴兼過癮。
筆者不想分析故事的真偽或者炒劏房道唔道德，但即使只有一半真，都正正反映了恒久的真理：親自走落各大社區、親身去接觸、感受市場氣氛。用心的投資者，常會為了證實一些主觀想法，不辭勞苦去行勻每個角落，扮鬼扮馬搵經紀、業主探虛實試底線。若後生仔薄皮、懶散，又豈能找出商機？
這位網絡炒家的發達之路，不是一般人能效法，就算給你們「二次創作」，都未必有成果，所以這些故仔，睇睇好了，路始終是靠自己行出來，而唔係睇了別人的故事，懶有啟發，自以為「學到嘢」就感覺良好。拒絕深入市場，你就只能等睇另一人的故事。
讀者 八王子
本欄園地公開，歡迎各界來信，以450字為限，請電郵至mailto:[email protected]，註明《家》樓民講場，請留聯絡電話。編輯保留文章的刪減權。