應屆港姐冠軍朱晨麗自爆曾住劏房，但升呢成為港姐冠軍後即時脫貧，昨日陪伴遠道由蘇州來港的媽咪到尖沙嘴行街。朱晨麗出手闊綽，在名店內連掃兩個手袋，媽咪更即場換上新購來的母親節禮物，炫耀一番。
出生於蘇州的朱晨麗，年前隻身來港當芭蕾舞蹈員，去年憑貌似陳法拉的靚樣上位，成為香港小姐冠軍。朱晨麗仍未卸任已獲無綫厚待，早前有機會到上海拍攝無綫新劇《名媛望族》，傳獲馬國明和吳卓羲兩位「筍男」垂青，向她獻殷勤；另又傳她與香港先生李晉強拍拖，魅力拍得住「電眼王」佘詩曼。
暗製造驚喜
明天是母親節，朱晨麗昨日暫且撇甩一班猛男做乖乖女，陪同由蘇州來港的媽咪到尖沙嘴行街。身穿豹紋衫襯黑外套的朱晨麗，與母親在美麗華酒店內的Twist閒逛。
早前是五一黃金周，不少商舖都減價，朱晨麗亦化身內地豪客，先選中一個三萬多元的真皮手袋，她見媽咪拿起Fendi小手袋愛不釋手，便趁媽咪試鞋時，偷偷叫店員留起。在店內逛了約20分鐘，朱晨麗到櫃枱埋單，朱媽媽看到女兒暗暗準備的驚喜時，即笑逐顏開，但又跟朱晨麗咬耳仔，似乎心痛她為自己破費。
兩人到附近商場繼續血拼，見到商場內以花朵砌成的「IloveMum」母親節佈置，朱晨麗即充當攝影師，以手機為媽媽拍下多張照片。
望儲錢買樓
朱媽媽顯得有點疲倦時，朱晨麗即讓她坐在椅子上休息，而自己則跪在地上，並拿出剛買來的戰利品細看，朱媽媽更急不及待換上新手袋，一臉滿足。
朱晨麗昨在電話中透露，原本想帶父母到星光大道影相：「爸爸第一次嚟香港，但今日（噚日）落雨唔想出街，我就陪媽咪行街，見佢咁鍾意個手袋，咪當母親節禮物。」問及價錢時，她避談說﹕「唔係好貴，有折頭。」她希望將來可以賺多些錢在港置業：「家唔使再住劏房，想買層樓同屋企人一齊住。」
採訪﹕譚倩宜
攝影﹕陳志嵐