朱麗倩日前誕下七磅女嬰，劉德華榮升爸爸，娛樂圈龍BB陸續駕到，楊千嬅預產期下月中，丁子高前晚透露舉家力保千嬅由入院到出院的五日內，BB房要裝修完成。同場的吳彥祖羨慕丁子高就快做老竇，也希望今年有喜訊，故會多留港製造機會。
劉德華50歲榮升老竇，第一次做媽咪的楊千嬅下月也臨盆。準爸爸丁子高前晚在圓方出席品牌Tod's活動，他指現時每日回家仿如去了迷宮，皆因日日有朋友送禮物，床仔、玩具多不勝數：「家我哋同裝修師傅全部oncall36小時，要喺千嬅入院開始，五日內搞掂BB房嘅裝修。」他稱已執好走佬袋，又搵定兩間後備醫院。
丁子高陪產唱飲歌
丁子高指千嬅之前恨出街，現時則累得寧願待在家。提到之前搵夏永康影大肚相，他說：「千嬅有着衫！冇露上面，冇朱茵佢哋尺度咁勁，我哋行型格路線。」
丁子高又透露上兩星期千嬅照肚，BB已經六磅多，十分大隻，手長腳長似足自己，但樣子就未清楚，現時預產期仍是下月中。
丁子高表示仍未克服到剪臍帶，但一定會陪產。問他和太太會傾甚麼？他謂不知，記者提議他唱其前組合VRF飲歌《寒冰掌》，丁子高說：「我自己都頂唔順，佢一定聽到笑。」
吳彥祖做呷醋外父
提到華仔生B，丁子高坦言有點感觸：「兩個太太都係差唔多時間有喜，就嚟到我哋。」將來可會對親家？他說：「未諗喎，咁長遠。」
同場的吳彥祖恭喜丁子高之餘，亦坦言心急生仔，希望今年做老竇，故會多留港陪老婆。他表示想要囝囝，因不捨得女兒將來去拍拖：「我怕打開門，見到個十幾歲嘅男仔上嚟，嗰個年紀最想做乜我好清楚，我唔捨得個女。」他直認是呷醋外父。
採訪：林嘉慈 攝影：陳俊強