梁烈唯最近牽涉入一宗醉酒鬧事中，有傳當晚他飲醉酒後，非禮一名同行女藝人。昨日兩個當事人梁烈唯和關婉珊為《法網狙擊》開鏡拜神，即場現身解畫，梁烈唯否認此事，強調沒到過警署，更未有警員聯絡他助查。
有傳梁烈唯早前跟洪天明、范振鋒和兩名女藝人到銅鑼灣夜店玩，梁烈唯醉酒後非禮同行女藝人，洪天明為護花而跟梁烈唯有肢體碰撞。其後女藝人報警，梁酒醒後向女藝人道歉，答應賠償精神上損失。昨日被指涉事的梁烈唯和關婉珊一齊出席新劇《法網狙擊》開鏡拜神，為醉酒鬧事傳聞解畫。
嚇親屋企人
梁烈唯否認其事說：「信有呢件事嘅人係好少，應該都冇人會信，我身邊人都打嚟，佢哋都覺得係笑料一宗，最主要係嚇親我屋企人，都同佢哋解釋咗，唔知點解會傳出一件咁嘅事，好開心好多人信任我，我真係冇出去玩，好耐冇出去飲嘢。」他自言是圈中人緣大使，不會跟別人爭執：「我都好飲酒，最近飲都係姚樂怡婚宴，傳出咁嘅事，真係大吉利是。」
沒列在演員表上的關婉珊突然出現，梁烈唯即說：「Hi！你好，關婉珊，我終於知道係你喇！」然後二人握手，並表示互不相識，梁烈唯說：「我最初聽到個名，仲以為係第二個，我以為係Coffee，我以為Coffee叫做關婉珊，真係太失敗喇！我咁唔識同事嘅名。」關婉珊稱沒跟梁烈唯飲酒：「嗰日我喺屋企。」
周家蔚撐天明冇夜蒲
梁烈唯又表示5月4日在太古城做騷直至12點回家：「我知道公司有同警察部聯絡過，香港咁多個區警察局都冇接過單咁嘅案，好明顯係無中生有。」
事件另一主角洪天明，其妻周家蔚昨與沈卓盈、陳美詩性感亮相「2012TVB最受歡迎廣告頒獎典禮」在尖沙嘴舉行的宣傳活動，周家蔚力撐老公婚後已很少去夜店，近日亦沒去夜蒲，她指與梁烈唯及其女友Tina均是好友：「唯唯通常揸車，唔會點飲酒，對Tina好好，一定唔會咁樣，佢好斯文。」周家蔚又不相信洪天明會在夜場打架：「如果咁誇張我冇可能唔知，一定冇，天明近日都好乖睇住屋企，喺香港我哋晚晚都一齊煮飯，佢早幾日先去咗上海打高爾夫球。」
採訪：楊潔雯、卓寶花
攝影：林德雄
