前香港先生冠軍高鈞賢最近好黑，佢前幾日喺夜店俾人影到有女仔坐佢大髀後，跟住佢代表籃球隊Steps參加公開賽，又搞到右腳腳踭嘅阿基里斯腱斷裂，前日要喺醫院做手術兼打石膏。
馮仁昭前日探過高鈞賢，佢話：「做手術都有啲驚，遲啲要做物理治療，醫生話要三個月先可以行，但佢話練得好可以快啲，所以我會畀心機，希望快啲好。」不過，聽講呢啲情況要完全好番要半年，高鈞賢都係小心啲好。
或辭演新劇
對於有報道話高鈞賢係俾女仔坐斷腳筋，佢話：「見到佢哋用呢樣嘢開玩笑，好唔開心，呢啲嘢唔可以拉埋一齊講。嗰晚係朋友生日，個女仔係我好朋友，佢只係坐喺隔籬。」問緋聞女友葉翠翠有冇詐型？高鈞賢話：「翠翠好關心我，受傷前覺得自己天下無敵，只係諗住做嘢，唔使心急識女仔，家傷到咁，都想有個女仔照顧。」同翠翠有冇發展機會？高鈞賢話：「家未有目標，我哋只係好朋友，但唔排除可能性。」高鈞賢最近接咗三套劇，要唔要辭演？佢話：「由公司決定，但休息咁耐，可能要換人。」