母親節逼近，稍好的餐廳價錢都很貴，不是個個花得起，剛出社會的兒女，想請媽咪吃鮑參翅肚，其實也有計。平成半的全花膠宴，又或幾十蚊吃到有機鮑魚，無論傳統中菜，又或fusion製法都有，擔保每個有孝心的子女都負擔得起。
記者：林佩婷
攝影：楊錦文、陳盛臣
Model：Rainbow、高爾珩
兩種花膠拍住上
到參茸海味店買花膠，除怕被人呃、怕成本太高又怕不懂浸發，但在中華紅，以上三種都不是問題。老闆陳總做開花膠批發，和總廚許師傅認識多年，而且識朋友在南美洲從事花膠買賣，於是可避過中間人而直接入口，成本自然低了很多，店內的花膠菜和外面比，起碼平近半。有好食材自然要有好師傅炮製，總廚許師傅從事中菜三十多年，曾於福臨門工作，對名貴海味很有經驗。「97年開始負責花膠浸發部門，識陳總多年，這次特地幫手，希望大眾都吃到平靚正的花膠。」由點心到主菜，按需要用上兩種不同花膠炮製。
店內透明櫥窗擺滿了兩種花膠，來自厄瓜多爾的黃花膠，塊塊黃色厚身。「正貨會透出光，無刺鼻氣味，唔使特地用薑和葱煮都可以。」黃花膠質感較煙韌爽口，適合長時間烹調，所以做扒、用來燉長時間的菜式最好。母親節自然想吃最好的，其中最震撼當是原塊足四両的鮑汁花膠扒。「發花膠唔係求其發，浸水一晚後，煲滾水慢火滾三分鐘，然後待凉，如是者加凍水再浸一晚，中途又要換水兩次才成。將發好花膠加鮑汁文火燜三分鐘，就已很入味。」當媽咪成塊花膠扒鋸住放入口，肯定好滿足。最重要是不用$300，平過出面一半有多。貪靚的媽媽需要極多骨膠原，即時再來一盅花膠鮮杏汁燉豬肺。選用河北靚杏仁生磨成汁，加上豬肺和花膠燉三小時，入口啖啖杏香，補肺又美肌。
較迷你一點的委內瑞拉銀花魚製成銀花膠，又叫蝴蝶膠，體感較腍，烹調時間較短都可入味和吸收，效果和黃花膠相距不遠，用來做甜品、點心等都合適。午市點心和粉麪都滲入銀花膠，總共十多款。搶眼的有花膠蒸粉果，海鮮餡加花膠及蟹子，極搶眼。簡單的腸粉加菇菌，肯定有益，最後來個花膠冰糖燉紅棗，清甜滋潤，媽咪肯定甜到入心。
中華紅酒家花膠專門店（23670038）
尖沙嘴加連威老道94號明輝中心1樓101-105號舖
幾十蚊嘆原隻有機鮑
戀戀鮑情的老闆同樣是鮑魚進口商，為令大家吃到優質而平價的鮑魚，於是開設了這間餐廳。他選用新西蘭15頭的有機鮑魚，質感腍滑，無論點煮都得。別看店子小小，分別請中菜及西餐酒店級師傅掌廚，確保品質。愛慢慢鋸啖啖鮑魚味的，就可選擇傳統蠔皇扣鮑魚，濃郁鮑魚香氣，再加上大大隻花菇，不用$50，真係抵。愛香口就有九層塔胡椒蝦煲，用上泰國新鮮胡椒粒、九層塔和指天椒等爆炒大蝦，熱辣辣吃勁惹味。緊接來個鯊魚翅燉鮑魚，鯊魚翅骨加上瑤柱、老雞、火腿和鮑魚燉足六小時，用料十足。新潮媽媽就可揀選Fusion菜式，鮑魚酥盒，內藏健康雜菇菌，放上原隻鮑魚和淋上鮑汁，一次過嘆到軟腍鬆脆。中西合璧的金絲脆蝦卷，大蝦加蔬菜絲，用春卷皮包着後捲上生面後再炸，超級脆卜卜。最重要叫到成桌鮑魚也很經濟實惠，不夠喉的話還可以外賣走，回家嘆個夠。
戀戀鮑情（28610666）
灣仔軒尼詩道61號地下