有傳「關二哥」梁烈唯最近牽涉入一宗醉酒鬧事事件中，據聞當晚佢同洪天明、范振鋒同兩個女藝人去銅鑼灣某夜店玩，當晚唯唯玩大話骰成日輸，好快俾人灌醉，之後同一個女藝人發生咗啲不快事件，有傳天明為幫女藝人出頭情急下動手，同唯唯發生身體碰撞。其後個女藝人報警，將結婚嘅唯唯曾向女藝人道歉，仲應承賠償精神上損失。
關婉珊口窒窒
馮仁昭噚日打畀喺上海嘅天明問個究竟，佢話：「第一，嗰間酒吧唔係我；第二，我冇出去玩過；第三，以我所知當日唯唯喺屋企，冇出過去玩。有人作到離晒譜，呢啲傳聞由得佢。」而范振鋒就話：「印象中冇，天明婚後冇出嚟啦，加上唯唯咁靚仔都唔使。」唯唯就否認同非禮事件有關：「冇呢件事，你哋應該問當事人。」提到關婉珊唯唯煞有介事，問係咪覺得有人放料？佢話：「冇任何睇法。」被指在場嘅女藝人關婉珊，對於有傳遭強吻，就口窒窒否認話：「都冇，同梁烈唯唔熟，同天明多啲見。咁啱我最近拍《法網追擊》話我俾人非禮，如果係我一定即場鬧佢。」
件事已驚動咗無綫高層，據悉由於唯唯係無綫重點栽培藝人，無綫唔想搞大件事，仲要求女事主大事化小。無綫外事部副總監曾醒明否認有藝人涉及非禮事件：「梁烈唯話上周五喺屋企，答嘅時候神態自若。到目前為止，警方冇搵過梁烈唯或要求無綫協助調查。」