統一（220）首季盈利爆升，令市場跌爛一地眼鏡。呢間向來落後康師傅（322）一大截嘅公司，無端端跑出，全因扑中咗兩隻拳頭產品：（一）「阿薩姆奶茶」，係全國最sell得嘅奶茶產品；（二）「老壇酸菜牛肉麵」，佔統一即食麵收入60%，全國排名只僅次於康師傅嘅「紅燒牛肉麵」。
統一嘅成功，好大程度係因為佢哋專發展埋啲冷門嘢，奶茶同酸菜麵之前無咩人同佢哋競爭，加上又開發到消費者喜歡嘅口味，呢點值得一讚。但康師傅今年已經決定唔再放生對手，擺到明㩒住統一嚟打，唔單止4月破天荒出咗兩支奶茶，又出埋酸菜味即食麵「補鑊」，仲動用銀彈政策，俾錢小型超市同士多舖「買架」，即要求貨架只獨家擺康師傅嘅產品，封殺對手。有內地傳媒話康師傅呢招已經令統一無咗近四萬個銷售點，每月少咗兩億（人民幣．下同）生意。海迪無法求證到呢個數字嘅真偽，但康師傅呢鋪埋身肉搏，必定對統一有唔細影響。統一今年仲加碼用40至50億擴產，只要生意稍有差池，現金流會番唔切。統一舊年自由現金流已經負數，手頭現金得24億左右，隨時有籌水需要。
海迪