入到馬場，可以見到唔少人用iPad睇馬，iPad隨處可見。呢日見到董事Ｃ，佢就用三星Galaxy喎，問佢何不用iPad，佢話用Android系統，覺得比iOS仲好，仲靈活。次日見到記者Ｃ，佢就棄用iPhone改用HTC，可見得電子消費品呢樣嘢，各有所好，iPhone雖然佔優勢，但並無絕對壓倒性上風。
三星上星期發表最新GalaxySⅢ，外國專家推介，但不知何時在港發售，左丁山係科技盲，對最新科技不甚了了，但見到處理系統已經去到Android4.0，記憶體有1GB，應該係最先進嘅。
與電子書出版人Ｍ講起呢啲科技，佢就苦笑，嘆一句：「點追呀？」追乜嘢？我地嘅孫明揚局長堅持抱病返工，話要完成兩件心頭大事，第一件係國民教育，已經宣佈咗，第二件就係推動「電子教科書」，逼教科書出版商減價。殊不知教科書商話「電子教科書」成本仲高，需要學校有硬件軟件配件，學生家中有硬件軟件配合，如在全港推行，都唔知要幾多個億元。出版Ｍ話：「我地最苦惱一回事就係追上潮流，我地兩三年前開發電子書，以Android2.3為藍本，還沒大量出版，三星已用Android4.0，之外為求普及，此外還要提供Windows版本，iOS5.0版本，一書三版本再加中英文，即是六個版本，又唔知邊個版本會賣得，你話點辦？你話電子教科書點會比印刷本教科書便宜？」
聽佢講都煩，左丁山即刻想到最煩嘅就係清貧家庭學童如何與家住半山區嘅學童競爭？屋邨學校如何與CIS、男拔、女拔競爭？左丁山讀書之時，大家揸本書，一張紙，一枝筆，富家子最多有補習先生跟住，但讀書考試鬥勤力啫，富家子無明顯優勢，二十一世紀香港如全面用電子書，富家子有電腦有iPad，有iPhone，隨時隨地上網，下載無限數據，但窮家子即使有部平板電腦，可能要到處搵Wi-Fi上網，勤力讀書都未必夠砌，窮學校亦無資源購買全新電腦系統以配合電子教學。請候任梁特首諗一諗，未有方法解決digitaldivide之前就推行電子教科書/電子教學，只會擴大貧富差距。孫局長臨走埋下一個地雷，將來不知如何善其後也！