美國售武、北韓核危機，就係佢哋鍾意自製及研發武器，搞到全球政局混亂兼一鑊粥！勢估唔到，PS3新作《Starhawk》都拎埋世界陰謀論做題材，除咗有32人同場互射嗰份熱鬧，更追加建設軍備系統，自製鐳射大炮殺敵之餘，仲要忙於起樓、起防護罩同補給站，好攰啫。
記者：陳國輝
射擊Game都食腦
第三身射擊實在好濫，一味齋換新武器同轉換戰場，無乜新意喎。今次《Starhawk》畫面已算有交代，而且追加嘅「建設與戰鬥系統」當你殺死敵人或破壞地圖上嘅能源桶，就會獲得貴重資源，儲滿到一定程度，你就可以決定生產邊一類軍備。例如攻擊力好強嘅自動機槍台、鐳射炮等強力武器；又有防衞用嘅前哨基地、補給碉堡同防護罩；甚至可自製噴射背包站、鷹式機甲停機坪以及重戰車車庫等提升行動力嘅設備。但幾時做武器、幾時做防具，呢樣就係你策略上嘅取勝關鍵，而且軍備唔能夠無限任起，遊戲設定最多可以興建32項，至於如何分配，就決定咗你嘅成敗，絕對係一款食腦兼食力嘅新型FPS。
32人搶旗仔最刺激
除咗新加入嘅武器建設系統，玩得第三身射擊遊戲，當然有故事模式以及團體纖滅戰等激烈玩法，但講到最刺激過癮，首推搶旗仔模式！《Starhawk》最多可供32人同時出戰，亦即係話可分成每隊16人出場；而所謂搶旗仔，只要成功由敵軍嗰邊搶走旗仔，並帶回我方基地就算成功。聽落容易，但「揸旗人」肯定被敵人瘋狂圍攻，壓力勁大，萬一臨到終點先被敵人KO，咁就要由頭來過！所以，搶旗仔好講求攻與守嘅合作性，並非一味講英雄主義。
鷹式機甲停機坪
可以生產最強武器之一嘅鷹式機甲，佢可由機械人形態變成戰機，對空對地乜都得，最重要係勁型！
《Starhawk》
機種：PS3
類型：第三身射擊
人數：1人（支援32人網戰）
開發商：LightBoxInteractive
售價：$388
