汪明荃（汪阿姐）、黃淑儀兩大無綫阿姐，聯同錢嘉樂、羅仲謙、黃智雯、岑麗香等演員，一齊開拍新劇《巴不得媽媽》，噚日眾人喺將軍澳電視廣播城進行拜神儀式，面對一向鬼馬嘅錢嘉樂，連汪阿姐都話：「佢個係gag樣，拍攝時要對住佢，我都驚會忍唔住笑。」
讚岑麗香肯學
汪阿姐喺劇中飾演患有情緒病嘅角色，幾乎每個對手都會俾佢鬧，所以佢話要好好保護聲帶，希望拍攝時可以有最佳狀態。
喺一眾後輩之中，汪阿姐稱讚飾演記者嘅岑麗香敢問肯學，汪阿姐話：「有場戲佢搵咗我幾日，想我接受佢訪問，但俾我寸到佢暈。仲有一場戲，佢要喺豬場幫我執戒指，佢拍完問我得唔得，我好老實答佢，梗係唔得啦，你要夠入戲就落手執，越污糟嘅場面就越好睇。」汪阿姐袋錢落新人袋，果然都去得好盡，受惠嘅後輩真係要講聲多謝。
大隻仔羅仲謙再夥拍黃智雯演鬥氣寃家，汪阿姐喺戲中會棒打鴛鴦，其中一幕戲汪阿姐仲搵嘢掟黃智雯，汪阿姐發火你都咪話唔驚，好彩黃智雯一take過搞掂。