謝天謝地！我求驗客終於可以放低一百個心，事關前晚睇住天才球星奧蘇利雲（Ronnie）贏個人第4個世界冠軍後，終於收回「退役宣言」；抱住4歲餅印細仔，攞住今季賺到嘅600萬港元獎金後，佢選擇效法蔡san，休假半年嘆世界！
贏第4個世界冠軍
今屆決賽嘅戰程無高低起伏，Ronnie無論喺人氣及球技，一開局已凌駕英格蘭同胞卡達，最終贏18:11算係意料中事；反而比賽背後更引人入勝，先係比賽第4節開賽前，有新鮮退役嘅「桌球皇帝」亨特利亮相，觀眾拍手拍不停。再來係Ronnie同卡達曾喺08年同場決賽交手，前者曾講過會喺高峯退役，卡達又一直被小腸問題嘅克隆氏症纏擾；但終於大團圓結局，先後兩度做世錦賽「二奶」嘅卡達，賽後宣佈下屆再戰，再來係見到奧蘇一副慈父樣，抱住細仔攞冠軍獎盃。
可能自己攞上一個世錦賽冠軍（08年）時，細仔一歲未夠，噚日決賽細仔一直由嫲嫲抱住現場打氣，賽後抱住阿仔錫唔停嘅Ronnie都感動話：「成場比賽我只覺得我同阿仔喺現場，係我呢一生最美好嘅一刻。」
太多波打太少錢發牢騷
場上感人，其實呢支「火箭」嘅情路都幾迂迴，97年曾同前度女友育有一女Taylor-Ann，之後與另一女友JoLangley喺06及07年再有一女Lily及Ronnie仔，但有傳二人喺08年離異；最新一單情史係去年傳出佢同細10年嘅Brook-Leah相戀，而Brook嘅老竇係前桌球員JohnVirgo。
要留住Ronnie，桌總可能要做啲嘢，佢話：「我仲未要離開個球壇，我只係話要以家庭為先，要好好同家人享受冇桌球嘅日子，再決定去向；不過，桌總如果堅持要我哋50周內打27個比賽，我真喺覺得好攰囉。」「火箭」今次喺世錦賽擸完300萬港元獎金，今季累積獎金約600萬，當然可以嘆吓世界。