有些事存之已久，只是來到廿一世紀，突然變得很稀奇，像今天我們說的90後媽媽、或曰「嫩媽」。你回去問你媽媽幾歲生你、問你婆婆幾歲生媽媽、太婆幾歲生婆婆？才發現，少女十八廿二懷孕生孩子，根本是稀鬆平常事。只是今天我們學會了懷疑：湊唔湊得掂㗎？識唔識教㗎？其實女孩一變成媽媽，個個都是超人。
記者：劉嘉蕙
攝影：劉永發
陽光媽の媽：孫仔似阿仔
訪問當天，Leanne媽媽也到場幫忙打點，促成下面這張三代同堂合照。「咁早抱孫，我好開心！Leanne一向好成熟，所以唔擔心佢湊唔掂，家BB出咗世，佢多咗返屋企，我仲高興。」四十出頭當上婆婆，Leanne笑說媽媽試過被街坊誤會：「佢哋見到阿媽同杜杜出街，好震驚，以為佢唔知幾時生咗個，又無見佢陀仔。當然佢會好自豪咁話，呢個係我個孫！」
我開心！我媽仲開心！
何思諺（Leanne）去年做了一件全世界都不明白的事：她是「陽光妹」、廣告新星、雜誌封面寵兒，本來前途一片燦爛，卻突然宣佈跟樂隊MR.鼓手Tom奉子成婚。今年2月兒子生下來，90年出生的她還未滿22歲。娛樂雜誌極盡睇淡之能事，但這天看到Leanne和「杜杜」，仍是一臉陽光，更高聲宣佈「我很開心！」
「一年內結婚生仔搬屋，好多變化，我覺得OK，其實我一向都覺得自己OK嘅。人係咁㗎，當你話畀自己聽唔得，就真係會唔得；你話畀自己聽OK，就會發現身邊有好多支持。」Leanne愛讀《秘密》，是「吸引力法則」的信徒，認為人最緊要有正能量。「大肚時我常看七田真（日本教育學家），入面提到BB在肚裏面時已開始學習，孕婦的心情會影響到BB。所以我成日保持心情開朗，睇笑片、同BB傾偈、想一些美麗的畫面傳遞給他。」
外界為她想像許多「故事情節」，但在當事人眼中，事情發生的確突然，但沒有大家想像中困難。「一開始就決定要個BB，無人反對，個個支持，令我的心更堅定。當日Tom媽去我屋企提親，我阿媽即刻話：『好呀，如果你哋鍾意對方咪結囉。』跟住Tom話：『因為佢有咗我BB。』我阿媽仲話：『哦，好呀，得㗎嘞，媽媽會支持。』後來知道係仔，媽媽仲開心，因為佢生四個都係女！其實我阿媽生我時也20歲，佢係相睇結婚。」
三年大轉變
陽光仔の爸：唔准提離婚
生命多了一個人，兩公婆都覺得任重而道遠。一年前，Leanne放工喜歡去Kubrick打躉看書，現在有書在旁邊都沒時間看，但她不介意，「有次看電視，裏面有個女仔話要離婚，Tom突然擰轉頭同我講，『我警告你，唔准提離婚呢兩個字』。我隨口問點解，佢好激動，話我『仲問點解？總之唔得！』我覺得有BB後他變成熟了。」
生仔不是好玩好型
今日連中產都呻生仔貴，自言家底不算厚的Leanne三小口，有財政困難嗎？「我本身不喜歡花錢買無謂嘢，工作的錢都交給媽媽儲起，所以我其實有一筆錢喺度；另外都跟個人價值觀有關，可能媽媽都係好細個生我，佢成日教我，做人要知足常樂，有多食多、有少食少，所以我不覺得太大問題。可能以前一個月買三件衫，家啲錢用來買尿片，生活不是差很遠。」Leanne的模特兒背景，為她帶來服裝、韓國奶粉贊助，也間接慳下不少。
所以有仔趁嫩生？Leanne突然正色道，「有一個訊息我好想講，我覺得後生生仔是OK，大前提是你要有責任感和能力去承擔，也需要家人支持。千萬不要以為生仔是好玩和型。我好驚讀者睇報道，覺得阿邊個邊個都係咁，又走去生仔。尤其Tom好多Fans都仲好細個，怕佢哋誤解成件事。」
BB成長記……
陽光少女曾抑鬱
以為少女學做媽媽會「姐手姐腳」，Leanne卻是經驗豐富。原來她家中有三個妹妹，抱B湊細路她最熟手，「我10歲已經要接阿妹放學！」生仔最難一關是教，90後Leanne自覺勝任有餘，「我好注重胎教，大肚時睇好多書，上『親子王國』吸收家長經驗，又會播貝多芬俾BB聽──不過老公一返嚟就會播番Rock！」
中國傳統中大肚婆禁忌多多，但作為新時代媽媽，Leanne自有一套想法：「有人話大肚婆唔可以食雪糕，我都照食。醫生話雪糕係奶做，無問題。同埋我覺得大肚婆最緊要保持心情開朗，如果成日諗住呢樣唔得嗰樣唔得，好易有抑鬱。」
坐月期間她也疑似抑鬱，「剛剛生完，無得落床，成日困住一個地方，有無能為力的感覺，成日喊，見老公行過又喊、見到BB又喊，嚇到老公以為我有事。後尾問番，原來好多媽媽都係咁，其實係受荷爾蒙分泌影響，坐完月就無事。」
生下來，豁出去
生孩子令她更能體會媽媽心情：「我好感激媽媽，大肚以來一直好照顧我。記得有次落雨，佢送我搭的士，望住佢嘅背影，我忽然覺得母愛很偉大，好感動，哈哈明明大家成日見！家生了一個，先知媽媽生四個有幾辛苦，又返工又湊仔又做家務都搞得掂！」
生孩子更令她無所畏懼：「以前我好驚青，成日擔心啲Job，驚客人唔鍾意我；現在的心情是豁出去，放開了，有時間我寧願諗個仔鍾唔鍾意我啦！」社會上許多人，幾十歲仍不想SettleDown；這對小夫妻選擇早早「上身」，告別自由歲月，欣然接受這份天職安排──其實不管是90後80後幾多十後，他們的誠意，還是可喜的：「大肚時，有一晚Tom同我講，人生好得意，上天突然畀個BB你，呢個人唔識你，你又唔識佢，但係你同佢好親，要重新認識佢、照顧佢，呢種關係好微妙。家諗番，都覺得做父母係好神奇的一件事。」
90後媽媽開Party
上一代媽媽，懷孕生仔坐月湊仔，大部份時間孤單渡過；新時代媽媽卻懂得運用社交網絡，記者上「親子王國」討論區，竟發現有「90後媽媽」徵友Post，相約去街食Tea，寓交友於湊仔。
90年出生的Koey是其中一個，「我會參加facebook的媽媽Gathering，通常每次有十幾個媽媽出席，大型Party更有成百幾個家庭！大家交流湊仔心得，交換BB用品，識咗好多朋友。畀BB見多啲陌生人，都係好事，分分鐘連Playgroup錢都慳番！」訪問當日，Koey11個月大的囡囡泳喬全不怕生甫，跟陌生人如攝影師及記者玩個不亦樂乎。
嫩媽大戰無良老闆
Koey19歲懷孕，男友是貨車司機，旺季月入有三萬，收入過得去，所以決定提早結婚。早婚早生小孩，家庭沒有壓力，但卻被僱主恰。「那時做秘書，一有BB我就遞醫生紙；過咗幾個月，公司突然出四封警告信要炒我，把幾個月前發生的事拎出嚟講。我覺得不合理，告去勞資審裁處，公司竟然狡辯話唔知我有咗。好彩我有證據，準備晒SMS、叫佢提供CCTV記錄做證，終於庭外和解，我攞番萬幾蚊。」明恰妹？「我覺得係，本來同公司關係不錯，可能佢以為我細個唔識嘢。」
無咗份工，索性全職湊女。懷孕期間更坐老公貨車四圍去，「咁我起碼三餐定時有飯食。」後生女百無禁忌，「屋企搬屋，我仲幫手髹油。」笑言未有因大肚少了出街，不過有錢都「寧願買尿片先」，以前天天花枝招展，現在脂粉不施，「怕化妝品對小朋友唔好。」
小女人大志願
對女兒，Koey說沒有特別期望──如果有，應該是不要做自己的翻版。「我細個受填鴨式教育，成日要補習，好辛苦；所以一定唔會做怪獸家長，揀學校近屋企就算。我見過好多名校生，英文差、着校服都食煙。我覺得人唔一定要有學識，最緊要有品有禮貌。我父母好早分開咗，童年我斷斷續續兩頭住，跟爸爸好耐無見過面，佢應該唔知我生咗女。所以我一定唔會俾個女變成單親㗎！」
