不經不覺,自稱「香港良心」的亞洲電視原來已經做了55年,最近發揮二次創作,將尹光的《Mr.One》重新填詞成台慶歌《GimmeFive》,更動用全台藝員拍MV,可惜惹來一致負評,亞視今次的傑作可與莊冬昕的《食軟雪糕》睇齊成為年度膠歌。
本月29日是亞視55周年台慶,未知是否資金短缺,今年請不起AC米蘭球星岩布仙尼唱生日歌給自己聽,惟有度橋谷人氣。早前亞視新聞播錯波惹人注意外,創意無極限的亞視又想到二次創作,將廟街王子尹光首《Mr.One》重新填詞成台慶歌《GimmeFive》,兼全台總動員一齊拍MV,一班藝員戴着黑超猶如喪屍般摸黑喪rap,普通市民大抵只可認得出林韋辰、朱慧珊和劉錫賢,若認得出陳嘉輝、戚黛黛、馮雪冰、亢帥克等明星,就肯定是超級亞視迷。
尹光讚過癮
由梁智威填詞的《GimmeFive》,空洞內容和混亂邏輯並不是本文所針對,而是亞視十足被迫害妄想症般,從不檢討自己不足。歌詞一句「明明香港第一間電視,點解唔係one,屈我做二」,言下之意是亞視被人預設成第二台,收視低迷有得賴。亞視連友台都踩,笑無綫「吹BB」同「CCTV」,但明明亞視才是最先被嘲笑是「中央台」,一百步笑五十步。再加上首歌不停「阿周」、「阿周」,聽到人都癲。若數年度膠歌,此歌可與莊冬昕的《食軟雪糕》睇齊。
MV被人喪插,全因欠缺「全能」的陳啟泰,他最近重返亞視,但當日有事而未能拍攝。他昨在電話中表示看過MV:「感覺麻麻哋,冇乜嘢吖。」提到MV被恥笑,他說:「咁唔關我事!我當日唔得閒所以冇拍,拍咗另一條片,遲幾日就出,不過都唔係好正常,但都幾好㗎,我鍾意㗎。」尹光則在電話中說:「聽咗啦,唔錯,幾過癮,我唔介意俾人抄喎,證明係好嘢至俾人抄啫!」
採訪:林妃