城中相信冇乜人會鍾意「香港禿鷹」，但「英國禿鷹」保特喺英倫就人見人愛，特別係阿仙奴啲粉絲。曾經係阿仙奴後防Big5之一嘅保特，力壓前中堅拍檔阿當斯，代替退休、跟足雲格16年嘅名宿賴斯，正式做咗領隊雲格嘅副手。49歲嘅保特喺00年掛靴後，01年開始喺兵工廠嘅青年軍教波，仲幫球隊贏咗兩次英超青年組冠軍（08/09同埋09/10），同埋一次英足盃青年組冠軍（08/09）。所以，佢真係夠晒條件做教授嘅副手。另外，聽講阿仙奴就快用1,700萬鎊（約2.1億港元）斟掂雷恩中場馬維拿，睇吓佢哋經過大變動後，下季會唔會有一番新氣象啦！