黃毓民、陳偉業兩位議員利用議事規則要求點人數，玩到立法會流會，一啲報紙（包括所謂知識分子報）指責立法會議員對不起市民，簡直攞嚟講，啲主筆其實係頭腦不清或可能已受「招安」。民主議會內要少數服從多數，但亦有保護少數聲音嘅規矩，例如美國會議會就有filibuster，反對派議員一個人講幾小時，甚至讀電話簿，目的係阻止某議案順利通過，簡單啲講，就係拉布。美國報紙評論員唔會駡呢啲議員對不起人民嘅。黃陳二人不時提出數人頭，其實係初級戰術，我地在大學學生會開會時，已經用過不知多少次，建制派議員如果不耐煩，大可全部乖乖地坐在立法會議事廳內，黃陳發言提修訂時，你地咪刨小說，讀三國，審閱其他議會文件囉。到依家都唔知道政治遊戲點玩嘅議員，未免過份天真，下次唔好參選嘞。
今年係選舉年，三月二十五日選完特首就要到九月九日選立法會議員，故此政治事非特別多。呢晚飯局上有精於公共事務、極富經驗嘅傳訊總監K，佢話唔駛睇通勝，都知道九月中之前，大事不宜，乜都唔好做，以免俾傳媒渲染，議員抽水。問佢有乜具體做法，佢舉一個例：「每年暑假，好多人放假，一啲例牌工人調動，就趁暑假執行。但一啲工人如果唔想調去其他地盤，鍾意留在市區工作嘅，說不定會打電話俾職工盟或工聯會，甚至向蘋果報料，話某無良機構暑假裁員，咁我就會搞到灰頭灰臉，俾李卓人或者王國興鬧到一面屁，我老闆又會俾報紙玩一輪。當區參選議員更可能玩遊行示威，帶埋工人上門抗議，要我地主席接抗議信，你話幾煩呢！我地公司今年一於緊守『大約在秋季』嘅原則，等班議員入晒添馬艦先！」
聽完佢講，對照吓一啲新聞，傳訊K好似幾有道理噃，一啲放風落區參加直選嘅人士確係盡量「剝削」任何一個機會，落區搞遊行抗議東、抗議西，希望增加曝光率，攞選票。不過點樣抗議都係唔夠黃毓民咁曝光㗎嘞，民建聯當年極力擁護比例代表制，呢個制度如今成為黃毓民等嘅護身符，只要在選區攞到十分一選票，那怕得罪其他90%，一樣可以當選，故此搞激啲又何妨。