鄭嘉穎呢排都算黑仔，除咗俾網民惡搞佢係橡膠穎，又俾同劇嘅武術顧問冼灝英公開話佢份人自我。嘉穎噚日喺沙田馬場出席活動時就主動講到呢啲是非，說話入面仲有骨有火，唔知係咪谷得太耐呢？
受訪時嘉穎話今次返港係宣傳無綫劇《拳王》同埋即將播出嘅內地劇《步步驚心》，問佢覺唔覺自己呢幾年當旺？佢就開始對近日嘅負面新聞作出反擊：「事業幾順利，但有得有失，是非多咗但會正面面對。」講到俾一齊拍《拳王》嘅冼灝英指摘，同埋被指獨孤精，嘉穎老實不客氣話：「拍攝時除咗冼師傅係顧問外，仲有泰拳師傅，佢哋六、七歲就學泰拳，姿勢好正宗，我要咁短時間學好姿勢，有乜問題都會問最正宗嘅，如果呢個過程令到人唔開心我講對唔住，真係唔好意思。我唔係話冼師傅教得唔好，但可能佢大聖劈掛會好啲。」
捍衞言論自由
至於被指喺拍攝現場講粗口，嘉穎只係話打拳講咗都唔覺，跟住仲帶啲火話自己係演員，工作係專心演戲，唔係做公關交際應酬，唔講嘢都唔係錯事，佢話：「我做番自己，唔係為其他人生活，每個人都有言論自由，我都有自己立場。」