海迪最近和經紀食飯傾偈，無一不唉聲嘆氣，並異口同聲話，擔心第二波投行裁員潮即將殺到埋身。
的確，港股已經有一段時間日均成交得嗰400、500幾億，咁嘅交投量，對投行來講係維皮都未夠，咁落去都唔知點算。
咁dealflow又點呢？君不見Primary（新股）市場已經死得七七八八，Secondary（配股及相關產品）又來來去去只得幾間外資行間唔中開到齋。有賓架坦言，如果呢一次鑽石之王Graff帶唔起個新股氣氛，呢一輪啲deal仲係出唔到，相信好多投行都無得揀，要喺今季尾再度大規模炒人。
事實上，兩個星期前，市傳有兩間美資行又再開始以細水長流式派信裁員；一間歐資行啱啱日本炒完人，唔知幾時到香港；仲有一間本地券商，傳聞要裁員上百人，好彩至今都係只聞樓梯響。海迪對Graff成功上到市唔樂觀，事關公司索價（即市盈率）唔平，喺呢個一街都係平貨嘅時勢下，好惡搞。如果新股再唔肯面對現實，海迪相信經紀們嘅憂慮，好快就會成真。