音樂創作人兼孝順仔林一峰噚日一早起身，喺屋企煮早餐畀媽咪食時，好有心機咁用切片機切蘋果做伴菜，點知唔小心突然跣手，畀切片機嘅鋒利刀片，批中右手尾指指頭，即刻猛流血，因為止唔到血，要急call經理人Sandy幫佢叫白車送入院，縫咗五針。
擔心冇得彈結他
正所謂十指痛歸心，一峰痛到入心入肺，但佢仲識講笑話：「好彩傷口仲椗住塊肉，差少少就成忽肉都冇咗。」不過佢最擔心係醫生吩咐佢10日內唔可以濕水，所以唔可以為媽咪煮早餐，亦唔可以彈結他。
問佢點解咁唔小心，佢唞晒大氣話：「近排比較多事，一路整早餐，一路煩緊啲嘢囉……」咁究竟煩乜？佢就話：「咪反網絡23條囉，諗下可以點搞，咪一時分心囉。」
讓位畀車禍傷者
噚日一峰切傷手入院亦有一段小插曲，佢本來俾白車送去瑪麗醫院，等候期間，急症室臨時收到一單撞車急症要急救，佢覺得相比自己嘅傷勢真係好濕碎，所以就流住血，偷走去另一間私家醫院睇醫生，佢話唔想阻住真係有急症嘅病人。