延續盛女話題，剩女係咪例必恨嫁？連公認的索爆女神劉心悠（Annie）都同你搭緊同一隻船，你就知剩女不可怕。劉心悠：「我好理性，乜都會Plan，惟獨結婚我Plan唔到。好多人都話劉心悠一定好多人追，我話唔係就係講大話，連Chilam都咁講過，所以我懶得再澄清。其實識得我耐嘅朋友就會知，我性格好男仔，大家對我有好多誤解。」女人會歸咎唔靚所以嫁唔出，其實完美得可怕一樣大鑊，心悠話自強先要有自信，說着，望望手中的水晶錶，嫁期於她，似乎沒超時這回事。
記者：雷福財
攝影：伍慶泉
場地提供：LaCucina
你揀人人揀你
剛拍罷電影《天生愛情狂》後，五月中又有新戲《浮城大亨》上畫，飾演富家女，與男角郭富城有曖昧戲。自言拍了多套電影後，對揀劇及角色開始腌尖。「以前拍戲唔會Mind，戲之嘛，但現在發現某些角色演過就唔想再重複，換個角度看就是多了要求。」連揀男友老公都係？「你揀人、人揀你，彼此都會有要求，戲係單方面，唔可以同一種態度。其實喺呢方面（結婚）一向唔主動，這個關乎性格問題，我信順其自然，所以覺得好多事不能強求，有些人會覺得年紀到咁上下就要點，但我沒有這樣框着自己。」自言天性怕羞的心悠，一放工就變身宅女。
唔Mind年齡差距
31歲的劉心悠表示感情真空唔愛Social，有時間寧願待家打機瞓覺。咁搞法邊有男人埋身？「我覺得自己係蝸牛同宅女，可能覺得屋企太方便，又有姨姨（工人）煮飯煲湯清潔，哈哈。以我咁懶的性格，將來另一半最好識煮嘢食，最好係興趣。我唔揀食，最緊要好味。」另一半要成熟事業男？「年紀對我嚟講唔係大問題，見過好多年紀細過我嘅都好成熟。」
家中最多BlingBling
不理別人目光，唔化妝或試過戴兩隻手錶出街，Annie話信自己就係最好打扮。「女人最緊要有自信，要識得催眠自己，唔好俾人一兩個字就打敗咗，要BelieveYourself。我一向都好鍾意水晶物品，手錶、頸鏈、皮帶甚至Scarf都有，總之自己覺得啱襯就OK。好似今日嗰條布狀水晶頸鏈，感覺好雍容華貴，當頭飾又得。同埋今日先知水晶的切割面越多就越閃。所以我覺得除心態、自信外，有時戴些顏色或者閃的東西，第一可以改變自己心情，第二有可能可改變自己的運氣呢！」
Swarovski（29722198）
銅鑼灣名店坊地下26-28號舖