足總星期三就會同現在台傾下季本地波頻道會否繼續營運，作為用家，當然是多一個台好個少一個台，反正都要畀幾百蚊一個月；但作為經營者（電視台）與資訊提供者（足總與球會），頻道存在價值與經營成本如何取得平衡，相信會是當日會議重點。
本地波要同英、意、西、德聯賽搶收視、搶廣告，現階段肯定是天方夜譚；技術差之餘，速度又欠奉，最重要就是冇星味兼冇得賭，咁又點去吸引人睇。唯一贏的是直播時間，下午兩點、五點或者晚上八點的黃金時段播波；只要戲碼好少少，收視分分鐘贏凌晨五點開波的國家打吡。
當然，本地波開賭暫時十劃未有一撇，但並非冇可能，畢竟前足總主席康寶駒曾極力爭取將本地足球博彩合法化。本地波頻道去年開台，各支甲組會每月夾4萬蚊畀電視台作為製作費。晨曦因為拒絕夾錢，主場比賽不會安排直播，但偶爾作客時都有得上電視，全季節省數十萬港元，足夠養起兩個華將，睇起來好似好化算咁。
不過，既然大家同坐一條船，球巿好大家好，反正本地波頻道經過一年時間後口碑唔錯，球迷亦冇因為直播而減少入場，若然某部份人堅持諗縮數，下季繼續菠蘿雞政策，一味靠黐；將來本地波發圍兼起啤，飛你出局就唔好怨天尤人。
筋肉人
周一．筋肉人
周二．仙道彬
周三．守丹
周四．視而不見
周五．丘建威