溫碧霞同譚耀文前晚去咗鑽石山墳場為電影《紮職》拍攝外景，但只係搵咗個凉亭扮公園景，咁點解要喺夜晚走去墳場拍咁嚇人呢？唔了解清楚仲以為佢哋拍緊鬼片，溫碧霞解釋話日頭拍咗一場佢戲中老公出殯嘅場面，導演梗係要順便拍埋唔使轉景啦。不過，溫碧霞都話夜晚喺墳場拍戲其實心驚驚，唔敢亂走開，而喺開工前亦都已經拜過神求心安。