其實作為三奶，我真係好多謝啲媒體關注，錯愛，日日全版見報，Like到冇得傾！
基本上我無做過啲咩嘢，只不過曾經做小三，而家做ex三奶，中間溝過條仔係港男！
對社會無甚貢獻……也有，做三奶得恩客善款，掃貨，吃喝，Hea全都對社會經濟推一把。尤其最近，媒體一版一版更係港聞版報導同個死佬單官司，嘩幾日喎，買廣告唔知幾多錢呢；威到……班小三，小四，小五，六，七，八姊妹Call到我個電話爆咗，又羨慕又妒忌，當我係女神，係偶像；為唔知第幾奶界吐氣揚眉！
其實個死佬都應該多謝我，係咁意補返啲宣傳費……
緊係，唔係我，屎識佢係乜鞋王？廠佬一個之嘛，鞋王？全賴有我呢個三奶又有我溝條港男，唔係？上報，笑住咁俾人影相？唔使諗啊佢！
班姊妹唔知幾興奮，以為舊時，一係你老竇做賭王或者天王巨星；又或者係特首太，官太；再唔係做名模做靚模個名鎮日跟城城，黃曉明，林峯，陳冠希……戀埋一嚿。唔係一定自拍床照㗎，淨係個名，從來未一齊影過一張拍拖相都冇所謂㗎，反正媒體受（讀者早已悶到生銹）又幫到啲PR公司銀……你地睇以上一切身份，淨係做，或者做過三奶即名成利就。吓，唔知有冇公關公司嚟搵我剪綵呢？唔搵就笨啦；平，靚，正。記者影到手軟拎返報館，編輯肯定用，大家Happy幾咁Like啊！
舊時仲以為做三奶，雖然有錢使有玩有飲有食，幾乎……唔使做，不過始終有啲唔見得光唔見得人嘅味道。而家，唓！原來三奶可以做得咁架勢，真係多謝晒啲媒體。