港交所（388）上市委員會大執位結果上周出爐，一共加入了九名新成員。我哋認為，最搶眼的莫過於新委任的副主席鵬誠峰。呢位鵬生實情係鬼佬一名，英文名叫StephenBrown。
鵬誠峰睇實企業管治
以我哋所知，鵬誠峰作風一如去年加入委員會的雷剛（TobiasBrown），以作風嚴謹見稱，將是會上的「異見」人士。雲集「雷」「峰」呢對孖寶於上市委員會，對於投資者無疑是好消息。
鵬誠峰早於06至09年出任過上市委員會委員。本版版主蔡東豪擔任上市委員會委員期間，曾與鵬誠峰共事。聽蔡東豪講，鵬誠峰開會時的風格與別不同，「以我當時經驗，佢除了跟足上市條例，亦好關注公司營運模式合理與否，以及企業管治等」。蔡東豪覺得，近年上市公司質素良莠不齊，鵬誠峰重返兼做副主席，將會成為上市委員會重要資產，「但日後開會時間就難免會長啲喇」。
分析員出身的鵬誠峰，做過金英證券香港區董事兼研究部主管，佢本身亦非常活躍於香港社會事務，定期喺《壹週刊》的英文專欄SecondOpinion，批評時政。今年3月，曾蔭權被傳媒連環爆出曾受盡城中富豪款待，鵬誠峰毫不留情在專欄中批評曾蔭權，「看來（曾蔭權）愛好追求奢華，已經不滿足於在機場使用VIP通道，還要搭富豪的私人飛機。」鵬誠峰亦係前立法會議員陸恭蕙有份的思匯智庫的研究所董事，大學時讀城市屋宇管理的鵬誠峰，除咗關心地政外，也積極為保護維港發聲。
閹尖一族 似足雷剛
有睇過本版關於雷剛報道的讀者，相信都對他在會議上獨立特行風格，略知一二。雷剛喺開會審議新股時，對新股的諸多營運細節，都會問長問短，雷剛曾接受本版訪問時坦言：「上市委員會委員不應機械式依照《上市規則》的字面解釋，而應該360度看一間公司，然後問一個問題：這間公司是否『適合』上市。」可以想像鵬誠峰同雷剛呢對孖寶，日後在上市委員會當中，都會係閹尖一族。
鵬誠峰與雷剛喺商界亦甚有淵源，鵬誠峰07年加入新加坡上市公司NobleGroup，做CorporateAffairs董事至今五年，雷剛有段時間，也曾擔任集團執行主席。
上市委員會新加入的另一名外籍猛將，是周怡菁（JuliaCharlton），佢係專攻企業融資的易周律師行合夥人。周怡菁喺企業融資界經驗豐富，撮合唔少大刁，佢本人亦坐唔少委員會，包括證監會旗下的收購及合併委員會、收購上訴委員會等等。至於金融界的華人代表，較為公眾認識的，就是葉劉淑儀姪兒、浩德融資的執行董事葉天賜。
長和系代表換人 影響力不減
新一屆的上市委員會大改組，和黃（013）公司秘書兼法律總監施熙德將於今年退任，長和系就有另一位女將──長實（001）企業策略部總監兼公司秘書楊逸芝加入。楊逸芝本身已經公職多多，包括出任上市公司商會常務委員會等。
原本是上市委員會副主席的李嘉士，喺委員會改組後，將獲委任為主席。李嘉士2009年已經加入委員會，是胡關李羅律師行合夥人，公司客戶包括李嘉誠等華資富豪。睇過現時委員會的新組合，相信華資富商影響力未有太大改變。
