上回提要：SOHO（410）夫妻上星期初宣佈去咗一個神秘地方度假，嗰度冇手機冇網絡，就係咁，兩人失蹤咗幾日……原來佢哋連樓都唔賣，係要去探索北韓！
去北韓，入境之前要放低電話，雖然可以帶電腦入境，但就冇得上網，一句到尾：與世隔絕！SOHO老闆娘張欣喺微博度話，嗰度其實一街都係紀念碑，好多新婚夫婦喺碑前影婚紗相（華華心諗：唔通係接受烈士嘅祝福？）
佢哋一行17人跟團去，大部份係外國人，酒店喺島上面，朝早晨操只可以留喺島上，張欣好鬼馬，影咗老公潘石屹做掌上壓嘅相post上微博。老潘話自己可以一組做10吓。
潘石屹本身都係龍友，但北韓唔係度度都俾你影，結果呢？潘總都冇情講，喺板門店俾兵大哥截住「了解情況」，仲想沒收相機㖭，好彩睇過佢都唔係影啲乜嘢機密，所以先可以「無罪釋放」。