【本報訊】尚有個多月暑假來臨，為打擊青少年吸毒活動，警方連續多次展開代號「拯救者Retriever」行動，大舉掃蕩油尖區的樓上吧。但你有你掃，大批仔妹依然晚晚索K（氯氨酮）索天光，有蒲友更向本報提供一批在樓上吧舉行的索K派對照片，肆無忌憚的程度似明剃警方眼眉。記者︰陳偉雄、邱錦綉、陳達浩
由於深圳公安大舉掃蕩，當地不少夜店相繼「冚旗」，使得原本北上「take嘢」的港青「回歸」，留港「消遣」，造就油尖區湧現大批樓上吧，讓一眾迷幻青年繼續索K沉淪。
性感妹吸客上門
警方為打擊這股極速滋生的青少年吸毒熱潮，今年以來展開多次代號「拯救者Retriever」行動，大力搜查山林道、河內道、廟街和吳松街等油尖區的樓上吧。每次行動，警方除撿獲毒品外，並截獲大批未成年少女，最小的只有13歲，可見青少年濫藥問題十分嚴重。
「警方幾乎一個禮拜掃兩三次，但我可以夠膽講，樓上吧係掃唔晒」。活躍尖沙嘴的蠱惑仔阿邦表示，現時油尖區約有百多間樓上吧，再加上無牌經營的，可能超過200間，「樓上吧嘅流動性好大，就算今晚俾差佬掃咗，佢唔使幾日就可以喺另一地方再開。」阿邦稱，樓上吧一般分為兩類，第一類如普通酒吧般只有大廳，收入場費後提供任飲服務，一般男士收150至300元，女士免費，「好多場都會搵一大班妹仔上去玩吸引客人，所以每次差佬掃場，都會帶走成班着得好性感嘅妹妹仔。」第二類就如一般卡拉OK，有房無廳，「呢類場通常租俾人開Party，都係按人頭收費」。但兩類場都存在吸毒情況，「樓上吧夠隱蔽，索K都放心啲，所以先吸引咁多妹仔上去玩」。
常到樓上吧的阿傑（化名）表示，雖然警方連番掃蕩，但他坦言未驚過，「好多樓上吧嘅保安好嚴密，就算差佬查牌，客人都有時間毀滅證據」。
六十幾人索K派對
阿傑又說，雖然近日風聲緊，但不少樓上吧都常開索K派對，「上個月先喺河內道一間樓上吧參加一個大型索K派對，60幾人一齊索嘢，好似開緊大食會」。
從阿傑向記者提供的照片可見，當晚場內的吸毒情況十分誇張，清楚看到多名少女用紙盛載着K粉，再放近鼻孔猛索。有少女索完K後，神情迷糊地隨音樂起舞；而在茶几上，清楚看到放了一包包的K粉。阿傑說，他們之所以這麼夠膽肆無忌憚地吸毒，全因場內保安夠穩陣，「間場有兩度門，兩度門都鎖住，就算差人上門查牌，都夠時間將K粉拋落廁所，所以唔使怕」。阿傑又預計，暑假將至，樓上吧的吸毒情況將會惡化。