3月底先離開研富資產管理（RCM）嘅康禮賢（MarkKonyn），話咁快就搵到第二春。正如佢之前所講，自己一定會留喺香港，繼續佢最愛嘅資產管理生涯，唔怪得新落腳點就係上年7月先喺香港註冊嘅國泰康利資產管理（CCAM），做行政總裁。
管理CCAM千億美金
Mark上星期已經正式上任，負責帶領台資背景嘅CCAM喺亞洲進行策略性擴張。CCAM已經獲得香港證監會第1、4及9類受規管活動牌照，可以因應唔同投資需求提供各類型投資服務，暫時主攻機構投資者及保險類產品，遲啲仲會拓展亞洲證券同定息投資業務。
CCAM係台灣國泰人壽嘅投資旗艦同美資Conning嘅聯營公司，截至去年底管理嘅資產總值超過1660億美金，近年積極喺亞洲擴充地盤，包括喺內地同越南開展人壽保險、房地產保險等業務。有Mark哥加盟，對佢哋開展業務都好有幫助。