蘋機會：倫敦搶試GSIII　最強畫中畫

消息傳完又傳，機迷等了又等，三星GalaxySIII終於喺倫敦正式曝光。新機亦不負眾望，除一堆貼心「Smart」功能外，仲搭載四核處理器同其他最強硬件，突破智能手機樽頸功能，挑戰高清相片20連拍、畫中畫等「不可能任務」，順暢地展現於2,000名記者面前！

記者、攝影：韓繼聰

加入聲控功能

今次三星選在英國倫敦舉行新機發佈會，六點正式開始，但未夠五點已見大批記者喺門外排隊等入場。場館地方極大，更以管弦樂隊作LiveBand演奏，襯托機王出場氣勢。大會以DesignedforHumans作口號，全因機身設計全無角位，恍如一粒被流水打磨得光滑嘅圓石，儘管比GSII大一個碼，但觀感及手感都不錯。
各項設計都係以方便用家為依歸，令手機更Smart。其中恍如Siri孖生細佬嘅「SVoice」係重點，聲控功能支援八國語言，可惜未有中文。現場實試，外國記者試得好順好準，但對小弟嘅港式發音就唔多熟，要試多幾次先得。另一個「SmartStay」，可利用前置鏡頭，「住」用家對眼係咪望緊個芒，從而調校屏幕光亮度。GSIII仲可感應你嘅動作，如寫緊訊息畀某人，若拎起電話放喺耳邊，便改為即時幫你打電話畀佢，毋須㩒嚟㩒去咁麻煩。雖然以上咁多新嘢都唔算係超強功能，但就感受到Samsung嘅細心，真正做出一部能了解用家的「Smart」Phone！

■厚度只有8.6mm，加上全身渾圓，手感相當唔錯。

■未開幕已擠滿傳媒人龍。

■發佈會以樂團伴奏，極有氣派。

■屏幕加大咗，拍埋GSII度明顯大成個碼。

■800萬像素鏡頭，可連拍20張高清相。

■前置鏡頭都有190萬像素，同樣做到高速連拍。

頂級規格運行順暢

硬件方面，其實同傳聞中嘅大致相似，包括四核CPU、4.8吋HDSuperAMOLED靚芒、800萬像素相機等等。當中最驚喜絕對係鏡頭，雖然像素無大突破，但速度就快得過份！開相機唔使一秒之餘，影相更做到零時滯即按即影，兼連拍20張相，試影甚有真正相機的爽快感！再睇靚芒表現，HDSuperAMOLED果然非等閒，睇相睇片都有驚艷之感，拍埋iPhone4S嘅Retina芒，無論亮度、精細度、色彩，都能平分秋色。不過Samsung出名芒靚，係預計之內，反而GSIII玩到「畫中畫」就真係估佢唔到。「Popupplay」可以畀你Play片同時做其他嘢，無論開Email定開Apps，條片同其他操作都完全無窒，四核威力果然係勁！難怪現場睇到呢個功能示範，個個拍晒手掌。