3月時退出新民黨嘅屈奇安，退黨背後有內情。八方聽聞喺黃大仙新蒲崗駐紮嘅屈sir，打算揸住葉劉支旗出戰九龍東，希望爭奪九東新增一席，不過，中聯辦副主任林武力挺重點栽培嘅旅遊界謝偉俊，力谷佢做「九東金童」，同「九西鼠女」嘅梁美芬成雙成對。
屈老婆詐型
林武重施故技，希望好似幫鼠王芬咁樣，捧超人謝偉俊上位，所以西環搵啲所謂獨立嘅建制派區議員幫謝偉俊做樁腳，據說有人要求屈Sir屈就吓，排喺謝偉俊名單做阿二，做「超人抬轎員」，雖然屈Sir姓屈，不過卻唔甘心被屈，因此寧願退黨。
不過，有人認為屈Sir輸咗區議會，「食」力麻麻，做阿二好合理。屈Sir同八方講，唔評論呢啲傳聞，解釋退黨係因為太太「投訴」，不滿佢退休之後掛住搞政治，冇乜時間陪佢，老婆開到口，惟有退黨。至於係咪全面退出政壇呢？屈Sir就留一線，話唔會全退。