踏入5月各地聯賽漸收爐，莊家似趕住搵銀埋數，開盤花款多又自恃掌握軍情，盤口更狠辣、經濟不景，球會也狠心，紛紛大幅裁員換馬為下季；既然大家都殺紅了眼，又唔怕畀你嚇窒，就撐早場阿仙奴同錫周三主場大炒謝幕，殺戮過後，用享受心情欣賞英足盃決賽。
列斯聯升班失敗，大幅裁員，其中出名如阿歷士布魯士（其父季中被新特蘭免去領隊一職），年近28當打中堅照樣無得留低，父子先後失業，世界殘酷；雷丁升上英超掘金，照裁13人，連借得嘅樸茅中場好波之人梅連斯幫到手，也即棄讓他返回南部。可幸最敬重左閘夏迪，幾經兜轉又去過西甲，喺雷丁打番起；來屆重回英超，又可與十年前防線拍檔里奧費迪南等，少有仍「在生」嘅列斯聯舊戰友重聚。
世界咁大，當打之年唔憂會冇出路；要贏錢，也毋須急於一時，繫於一時成敗，上周四詳論5月小弟焦點賽事英冠附大形勢，幸首場推介順利命中；韋咸當日客W由推介嘅2.45倍打落至2.3倍（平手盤更驚人，由開飛九二水，跌至開賽七一水），輕鬆贏卡迪夫城兩粒，先勝莊家一仗，仲有4場。賽後感受係對手嘅實力真係比過去幾屆入到附加賽都弱，「槌仔幫」兩戰後耗力料會較少，是為上到英超尾班車最有利因素。
未踏入5月，阿仙奴快手落實簽下科隆王子普多斯基，難得狠勁；今晚足智彩第一場受注，少有為英超擔綱，仲係阿仙奴迎戰諾域治，不得不點題。爭到第3名踢到歐聯分組賽，執多數億元收入，不能再怠慢；對手諾域治夠分後季尾太hea，不過你識咁諗，莊家出手也狠，捧兵工廠[-2]要贏夠3粒。翻查兵工廠自04-05年再無捧過聯賽後嘅主場煞科戰績，7戰錄得5勝1和1負；其中有4場大炒對手，包括小弟與車仔躉友人，喺倫敦親睹嘅前年大炒富咸4粒。年年聯賽三三四四，今次後有熱刺及紐記兩大追兵，係廠人少有嘅近年重要主場煞科戰，希望呢鋪佢哋生生性性。另一推介，選英甲煞科，錫周三主場能大炒韋甘比，即壓同市錫菲聯，以第2名同查爾頓贏波升英冠去，鬥志爆棚。
今夜戲肉當屬利記車仔英足盃死決，身邊兩大好友兼波友分捧兩隊，呢場五五波，左右做人難；其實今場法定時間估和波，也屬心中之選。下次見報(12/5)
文：蘋果波神
今日重心推介
熱選：阿仙奴勝[-2](2.25)
冷選：錫周三勝3:1(9)、4:1(13)