候任特首梁振英嘅五司十四局班底，主要官員名單陸續曝光，多個副局長未有人選。食物及衞生局副局長嗰位，自從梁卓偉去咗做特首辦主任後就一直懸空。近日醫學界傳出，有「神探」之稱嘅衞生防護中心總監曾浩輝已經辭職，將會埋位做副局長。
八方驚聞此消息，即時四出打探，有人話神探輝嘅專業能毋庸置疑，有多次應付疫症經驗，同傳媒關係良好，轉做副局長勝任有餘。
神探輝唔吼副局一職
之不過權威消息人士卻話，呢單似係流料居多，曾浩輝唔似會辭職，因為佢鍾意留守喺自己專業範疇，對住細菌多過面對政客。神探唔脫離公僕隊伍，可能有更好前途呢！因為衞生署署長林秉恩下個月退休，八方聽聞熱門接任人選包括曾浩輝同食物安全專員陳漢儀，邊個上位，進入最後衝刺階段，好快有結果。
陳漢儀原屬於衞生署，幾年前被借調去食物環境衞生署做助理署長，07年晉升為D4級嘅食安專員。
論資排輩陳略勝一疇
曾浩輝個總監位同樣係D4，兩人官職咁高咁大，不過陳漢儀85年港大醫科畢業，高曾浩輝五班，講論資排輩，陳漢儀資深啲，因此有人對陳漢儀升職睇高一線。
陳漢儀過去幾年處理過三聚氰氨奶粉同孔雀石綠等食物事故，又幫手搞食物安全法，政績唔錯。陳漢儀幼稚園至中學都讀玫瑰崗學校，港大畢業後曾去新加坡進修，88年加入衞生署，2000年升為助理署長。
之前盛傳CY會搵支持者、私人執業眼科醫生周伯展入閣，不過周伯展係「月球」醫生，即係每月最少搵100萬，要佢做官，好多人相信佢未必肯㗎。
mailto:[email protected]