荷李活巨星韋史密夫（WillSmith）和老戲骨湯美李鍾斯（TommyLeeJones）這兩位黑超特警，昨日在洛杉磯聚首，一同宣傳新片《黑超特警組3》（MenInBlack3），同場還有佐斯布連（JoshBrolin）。不過，兩位黑超特警的表情迥異，43歲的韋哥身為主角，全程笑到四萬咁口，反觀65歲的湯美李鍾斯今集淪為大配角，難怪唧都唔笑，完全交唔到戲。
今集《黑超3》講述韋哥飾的AgentJ，會坐時光機由現代回到1969年，解開湯美李鍾斯飾的AgentK突然人間蒸發之謎，並與佐斯布連飾演的後生版AgentK聯手，齊齊破壞外星人入侵地球的陰謀。
道具放錦囊
換言之，今集故事主線可說是圍繞到韋哥和佐斯兩人身上，湯美李鍾斯淪為大茄，戲份少之又少。昨日在宣傳活動上，大會安排眾演員將戲中招牌道具和宣傳物品等放入時間錦囊，只見湯美李鍾斯全程肅立冇乜笑容，就算韋哥等人在大合照時故意讓他站在中間「敬老」，湯美李鍾斯依然燶口燶面。
起初唔願拍
不過，當舉起手槍指向在場攝記時，湯美李鍾斯即流露威武神色，認真抵死。其實湯美李鍾斯當初曾公開表示不想接拍《黑超3》，今次勉為其難為電影仆心仆命，總算有交代。
另一方面，以往的《黑超》系列曾邀明星客串扮外星人，如第二集就有米高積遜（MichaelJackson），今集則會有百變天后LadyGaGa、加拿大小天王JustinBieber、鬼才導演添布頓（TimBurton）等過鏡，大家到時要落足眼力欣賞！