做過日式煎蛋卷的朋友，一定深明蛋卷就如無間地獄，大家都有很多層，而且捲好後，還要拋鑊，無論對無飯港女，還是入得廚房的盛女，都是一大挑戰，看她們如何使出渾身解數，來個破地獄！
記者：徐務研
攝影：劉永發
鳴謝：香港逸東「智」酒店Yagura日本餐廳（27101010）
評判 湯均武
香港逸東「智」酒店Yagura日本餐廳總廚，入行十多年，出生於廚師世家，曾遠赴日本學習地道日本菜式，擅長手握壽司、天婦羅及串燒等。
叠唔起蛋卷變炒蛋
今次請來兩位80後盛女，闖入廚房挑戰令人聞風喪膽的日式煎蛋卷。五、六層的蛋卷看似簡單，但每層蛋漿不可太熟，並要與另一層完全融合，極講技巧，「若蛋皮太熟，叠上時便黏不穩，一夾即散。」Yagura日本餐廳總廚湯均武表示。湯師傅一開始MrCool上身，只管做，不多話，只見師傅輕輕鬆鬆叠了一層又一層，更使出亮麗的拋鑊技巧，看得Janice及Gigi目瞪口呆。師傅的蛋卷工整又滑溜，兩女還未回過神來，師傅便拋出一句：「邊個嚟先？」
Gigi深明行先死先的道理，立即推Janice出來，儍儍的Janice拿起平底鑊開波，當做第一層蛋卷時，Janice大呼救命，翻蛋卷時手臂不夠力，師傅Cool還Cool，但仍細心地逐步教。可惜Janice決定應用盛女必殺技──alittlebit刁蠻，就是亂來，胡亂拋鑊，令蛋碎亂飛，結果比較像炒蛋多於煎蛋，經過一輪血與汗的掙扎下，蛋卷勉強完成，外形完全不堪入目。
看着Janice壯烈犧牲，Gigi直言好驚，但亦諗出盛女必殺技──45°，以此角度來煎蛋，Gigi一開始有點手忙腳亂，而且當有蛋碎飛出時，更大叫：「睇唔到！」不過Gigi除了拋鑊有點狼狽外，其餘時間都煮得有板有眼，連在旁的師傅也點頭嘉許。小記忙不迭訪問師傅：「你覺得Gigi以45°煎蛋，會否份外吸引？」師傅：「個蛋卷又真係幾吸引。」Gigi最後順利完成，外形和師傅煎出來的有八成相似，師傳也大讚Gigi有天份！
參賽者一號：Janice
準白衣天使，被喻為Q版孫燕姿，咁大個女只係煮過公仔麪，連雞蛋也很少煎。
參賽者二號：Gigi
身為空姐，有十多年入廚經驗，自言最拿手的菜式是Pasta，其實乜都識整。
日式煎蛋卷
煎蛋卷一點也不簡單，要做五、六層，夾起來不散，而且口感又夠嫩滑才算是好的蛋卷！
材料
雞蛋10隻、木魚水/味醂/清酒/醬油各100毫升
做法
1. 雞蛋拂勻，加入木魚水、味醂、清酒、醬油拌勻。
2. 長方鑊內下油，加入適量蛋漿，鋪滿鑊底，當煎至半熟，翻起摺兩或三次，再往鑊底抹油，加入適量蛋漿，用筷子撐起煎好的蛋皮，讓蛋漿滲入蛋皮下，當煎至半熟，翻起對摺。
3.餘此類推，重複約六次，盛起後切件即成。
日式溫泉蛋雜菇沙律
嫩滑溫泉蛋加上清新沙律，入口傳來陣陣菇菌香，清淡得來味道又豐富，作為前菜一流！做溫泉蛋非常考技巧，秘訣在於溫度上的控制，一定要維持60℃！
材料
靈芝菇/金菇各30克、冬菇1粒、牛油10克、清酒10毫升、醬油5毫升、雞蛋1個、鹽1/4茶匙
沙律：車厘茄5粒、沙律菜/青瓜片各適量
做法
1. 先做溫泉蛋，煲滾水至60℃，開慢火維持溫度，加入雞蛋，煮25分鐘，取出備用。
2. 靈芝菇去根部；冬菇去蒂切片，備用。
3. 鑊內下牛油煮溶，加靈芝菇、冬菇、金菇以中火炒香，加入清酒、醬油、鹽炒勻。
4. 碟上放車厘茄、沙律菜、青瓜片，放上（3），打入溫泉蛋即成。
貼士：
做溫泉蛋一定要維持60℃，基本上煮至水溫60℃後，轉慢火便可，若溫度過高，可以加冰降溫；如果溫度過低，則要轉中火煮熱一點。
味噌和牛茄子卷
和牛加燒汁，味道非常惹味，茄子也夠軟腍，口感夠豐富！
材料
茄子1條、澳洲和牛2片、牛油/燒肉汁各適量、芝麻/木魚絲各少許、糖10克、清酒10毫升、味噌30克
做法
1. 先在茄子皮上打直輕輕幾刀。
2. 燒滾油至180℃，下茄子浸10分鐘，盛起，放入預熱至180℃焗爐，焗8至9分鐘，取出去蒂去皮。
3. 將味噌、清酒、糖拌勻成醬汁。
4. 澳洲和牛鋪平，放上茄子，塗上醬汁捲起。
5. 鑊內下牛油煮溶，下（4）煎至上色，加燒肉汁後盛起，撒上芝麻、木魚絲即成。
貼士：
若覺得油浸及焗太麻煩，將茄子烚熟亦可。