三名廉署調查員被控入罪，要坐監，聞者惜之，做廉署調查員，都係打份工啫，何必過份熱心到越權，不依照官方既定程序行事，執法人士要經常保持頭腦冷靜，按照法律行事，嚴格遵從法律程序，否則累人累己！但廉署近年作風急進，例如最近就有不少「接近廉署消息人士」向報紙說這說那，令守法人士為之側目。
全世界嘅執法人員，都害怕入獄，試想在獄中碰到不少以前被自己查處檢控嘅「仇人」，大家唔知會點樣「互動」？呢日在中午飯局，見到太平紳士B，我地問佢獄中有否報復事件，紳士B笑曰：「冇嘅，冇嘅，香港好文明，獄卒會睇得好緊。」紳士有個責任就係久唔久被選中去巡視監倉，聽取囚犯意見或投訴，咁紳士B聽過乜嘢投訴呢？紳士B又笑：「從未有監犯向我投訴任何事情。」唔係嘛，咁天下太平？紳士B之為紳士，果然對答如流，為滿足我地嘅好奇心，佢話：「紳士Y對我講過一個投訴個案，就係一名囚徒向佢投訴監倉供應嘅糖水太淡而無味，紳士Y於是向獄長查詢；獄長解釋俾佢聽，投訴人係一名毒癮好深嘅癮君子，因吸毒藏毒入獄，此等人因食白粉太耐，已失去味覺，對任何食物都覺得味道淡，即使不幸染上糖尿病，仍然要飲糖水加好多糖，紳士Y聽完，唯有一笑置之。」
叫紳士B講吓甚麼黑獄黑幕，用把餐刀撬佢把口都唔會講，於是大家講經濟，提起雷鼎鳴教授之鴻文分析新加坡模式是否可在香港應用（教授答案是NO）。律師H本是經濟分析師，佢話新加坡嘅移民政策全向精英傾斜，十年來新增人口全對新加坡經濟有貢獻，相反香港人口移民十分被動，難以預測及量化移民對香港之貢獻。譬如佢處理不少離婚案件，六七成與老夫（港人）少妻（內地人）有關，至於接受法援處轉介之離婚案件，更係十成十與新移民（少妻）有關。律師H有一次甚至要扮演社工角色，勸一個被少妻離棄之地盤工人（年紀比老婆大三十年）不要跳樓自盡！香港老男人之最大毛病就係上大陸娶個年青靚女，以單程證申辦入境，少妻到港取得身份證後，就有機會擺脫老夫搞離婚囉，此等少妻移民香港之後，平均生產力肯定不如本地人，變相拉低香港之增長，情況剛與新加坡嘅移民相反。