有人說，在娛樂圈混得久，人就會變得老練，但是眼前這位快將踏入四字頭的葉蘊儀（Gloria），卻沒有絲毫世故的感覺，因為她笑得夠真。自言14歲入行時是「一嚿飯」，現在卻努力為自己醉心的藝術打拼，亦無意重投猶如萬花筒的娛樂圈。Gloria認為專注很重要，就如做陶瓷的過程：「好似修行咁，要重複又重複去做。」 撰文：盧妹
葉蘊儀早於14歲已經踏足娛樂圈，她的可愛娃娃臉令很多人留下深刻印象，現時育有一子一女，在尖沙嘴K11開設紙黏土藝術學校的她，由娛樂圈走進藝術世界，享受手作仔帶來的簡單快樂。
Gloria謂：「我家日日都整黏土、陶瓷，每日都會創作，黏土係簡單嘢，年輕人會容易上手，但係我就鍾意做陶瓷多啲，做嘅時候你覺得好完美，但係燒完出嚟可以唔同晒，成個過程要好慢、好認真、好細心，我覺得做陶瓷好似修行咁，要重複又重複去做，可以訓練耐性同專心。」
傻更更入娛樂圈
由十多歲開始就愛上陶瓷，現正修讀藝術碩士課程，Gloria興奮表示：「仲有一年就畢業啦，打算兩年後就舉行個人作品展，上個月先同四個artist一齊搞咗個作品展。」
Gloria續說：「其實我接觸過好多唔同範疇，攝影、畫畫、雕塑等等，令個人擴闊咗好多，當年我都係讀到中五，家讀書其實先係完成兒時心願。」
Gloria坦言當年入行是「一嚿飯」，本來只是打算做幾年娛樂圈便出國讀書，她直言入行的時候年紀太小，但是在娛樂圈令她成長得很快：「入行嗰時中四，個人仲係傻更更咁，人哋叫我做乜就做乜，都係入咗行兩、三年先知道呢份係職業，但係從來冇諗過自己係明星，呢啲經歷令我家個人獨立咗、成熟咗。」
偶然客串過戲癮
問Gloria對娛樂圈仍有否留戀？她頓了一會說：「唔係唔留戀，對我嚟講，只係一個時期，人生有好多唔同階段，十幾廿歲就係拍電影，家就係做藝術，每個階段都好enjoy，當然，家有人叫我客串幾日都會做，但係就唔打算全面出番嚟啦！」
Gloria指仔女不清楚她從前的工作，不想過去影響他們現在的生活，她表示：「開頭佢哋唔知我做過藝人，我又唔鍾意帶佢哋去function，佢哋有自己嘅生活，唔應該受我影響，不過個女有上YouTube睇我以前啲片，佢仲問我『媽咪做乜紮條咁嘅辮？着到咁得意？』，我都係同佢哋講只係普通工作嚟。」
做事講求專注的Gloria現時努力讀書，一對心肝寶貝是她最大的推動力，娛樂圈的花花世界，早已不是她的着眼點。