睇住皇馬提早兩輪封王，成為今季聯賽冠軍，未算眼寃，當英格蘭足總宣布由鶴臣出任國家隊領隊，都未算嬲，但係英足總強調，除了鶴臣，並沒有跟其他人接洽，即係話佢哋從冇考慮過哈利列納，哼，真係嬲到……幾乎想講粗口以洩我心頭之憤！
完全無可能知道英足總諗乜，無鬼端端借泰利種族事件，喺距離歐洲國家盃舉行前的4個月逼走卡比路，講真我唔係要爭卡比路，但以英格蘭咁鍾意講數據，佢嘅執教成績確係不俗，比起歷史上第一個非英格蘭籍的教頭，瑞典籍艾歷臣的67場40勝17和10負，得勝率59.7巴仙，又或者在英格蘭人心目中最偉大的教頭，帶領英格蘭在66年奪得世界盃冠軍，執掌國家隊11個年頭，藍斯爵士的61.1巴仙得勝率，仍舊不及卡比路的42場28勝8和6負，高達66.7巴仙的得勝率。咁你話喇，點解要「郁」卡比路？
哎！即使見過鬼怕黑，頂唔順維京後裔，又受不了拉丁人，都可以考慮蘇格蘭人莫耶斯㗎，我記得費格遜講過英足總至少斟過佢3次，想佢執教英格蘭國家隊，算嘞，即使一定要喺圍內英格蘭人入面揀蟀，都無理由係鶴臣㗎，真係好揀唔揀。好地地成個哈利列納棟喺度，點解連傾都唔傾就一心一意，屬意毫無業績可言的鶴臣呢？呢種黑箱作業，才叫我真正領教到何謂傲慢！
唔好話我純粹意氣用事，請大家先睇一下，英超幾個出色教練，費爵爺教咗曼聯26年，雲格接任阿仙奴都有16年，莫耶斯帶領愛華頓10個年頭，再睇吓鶴臣，論執教經驗，鶴臣比同齡的列納還要豐富，做教頭35年，帶過19隊波，平均每隊只係帶1.8年。相反地，列納喺29年內教咗6隊波，平均係4.8年，大家心裏都明白到，只有好業績才可繼續執教，連球會成績都唔多見得人，你以為我會寄望未來的英格蘭嗎？哎，英足總呢個玩笑係咪開大咗！
文：盧覓雪