朱茵與阿Paul公佈喜訊後，大家都好關心佢哋點同天父交代，而小記則好欣賞佢哋幅「報喜照」，雖未見肚，但感覺甚溫馨；有興趣影番輯？聽專業攝影師Kenneth話，八個月嘅肚最靚，家仲有只給孕婦的影樓，細菌小、又安全，心動？不如行動！
記者：張文蕙
攝影：伍慶泉、楊錦文（部份相片由被訪者提供）
只影孕婦的影樓
近年興起孕婦攝影，MyBabyStudio可說是幾專業的一間，佢哋有一個只為孕婦服務的影樓：「我們首個影樓是專給小孩，家呢個就只係提供給孕婦；絕對唔會有寵物攝影，媽媽就算瞓喺度都唔怕有細菌。」負責人Kenneth指由於龍B效應，生意排到密質質。
相片要有故事
坊間孕婦相往往大同小異：「最怕個個客嘅相，都好似CopyandPaste，Key個頭落去都得咁滯！我哋會先約見客戶，了解背景，然後要求佢哋帶點『道具』，例如第一份送給BB的禮物、結婚戒指、定情信物等。」
Kenneth指，好多媽媽買畀BB嘅第一份禮物都係鞋仔，有個媽咪話希望BB能夠腳踏實地。而攝影師Alan也即教路：「如果對鞋仔係靚嘅，我哋會Sharp喺對鞋度；如果係平民貨，我哋就會要求媽咪放喺肚側，Sharp個肚。」
爸爸引發笑
採訪期間，孕媽Jane與丈夫Simon剛啱開影，正好讓我們了解拍攝過程！駐場化妝師阿Mi：「孕媽不宜化過濃妝，因為佢嘅衣着是以簡約為主，加上慈母感覺應該是Pure，妝容亦以大地色為主。」
拍攝開始，Jane笑容太僵硬，Alan便叫Simon引老婆發笑，怎料Simon說：「佢見唔到我就笑得出了。」引得Jane即現歡顏。不過到爸爸一起出鏡時，佢就笑唔出喇：「可唔可以唔除衫露點呀？」結果要Alan說服他：「老婆着個Top，你就着到樽領咁，好奇怪囉！」
MyBabyStudio
收費：$2,888
內容：三位家庭成員、1.5小時拍攝、兩個造型、12張數碼相底（包送修飾）、化妝、8"×10"油畫相一張（女攝影師另加$300）。
網址： http://mybabystudio.com.hk/index.php
女攝影師 貼身細膩
喜歡女攝影師及拍外景的孕媽，不妨考慮起用IreneChui：「其實拍孕婦照，也不一定要露肚的，重回夫婦二人拍拖地，穿着衣服拍，表情也較Sweet！」
Irene指她亦曾與孕婦到美國拍攝：「多數客因知我剛啱喺嗰度，先會咁樣搵我拍照；特意請我飛去，價錢會較昂貴，建議可先問我年內的行程。」
場地方面，她建議在主題樂園外，或黃金海岸酒店周邊位置都是不錯的選擇。作為一個女攝影師，孕媽若想拍裸照或郁動孕媽擺Pose，就算有身體接觸也減少了很多尷尬。服裝方面，Irene建議最好較貼身，才能凸顯肚皮，與丈夫同色Tone，感覺較溫馨！
IreneChuiPhotography
收費：$3,800
內容：2小時拍攝、所有相片SoftCopy（簡單調校）、20張相片（修飾）
網址： http://www.irenechui.com