市面有不少民意調查，市場調查，是否能正確反映民情或市場情況，甚有疑問。左丁山本來唔係幾鍾意接受訪問，但係最近竟然接到四五個調查電話，於是聽吓，其中有三個似乎幾嚴謹，首先問清楚：「請問屋內有幾多人？」答：「四個。」問：「我地想訪問年紀排第三嗰位。」對唔住噃，人不在，於是掛線。另外兩個就唔同，一個係音頻訪問，一開始就講問題，答案有四個，一、二、三、四，第四個答案就係「唔係幾嚴重」；頭三個嘅答案就係：非常嚴重、好嚴重、幾嚴重。條問題係乜呀？就是：「某某人貪心攞便宜」，類似問題反覆四五次，未做完調查，幾乎已知道調查結果，可寫定標題：全城嬲爆某某某貪官。
上星期沙田陳太就接到某大學同學嘅民意調查電話，問香港貧富懸殊問題，與地產霸權有關，條條問題都帶有傾向性，陳太問位訪問學生：「可否先界定如何量度貧富懸殊，何謂地產霸權？」學生為之語塞，唔識答，照住稿佢直說再問下去，陳太索性對學生講：「你啲問題及答案好有傾向性，我認為好唔夠科學。」學生最後問被訪者教育程度，請揀一次：小一至小三，小四至小六，中一至中三，中四至中七，大學程度：陳太幾乎想答：「小一至小三」，不過最後都係答：「大學以上。」
呢類民意調查，甚為粗糙，但如果調查設計者以受訪者為小學生程度而設計問卷，的確可以振振有詞咁話香港民意如此如此，大概主流民粹意見就是如此形成的，調查結果如受傳媒渲染，直情製造市民精神緊張。
有云盡信書不如無書，現在我地可以講盡信民意調查不如無調查，信自己嘅分析與觀察好過。80後代表人物之一陳景輝如是云（明報四月三十日）：「民粹主義，附帶着強烈的反精英心理，煽動者直接鼓勵人民，樂此不疲地貶斥他們口中腐敗了的政治、社會和文化、精英階層，最後結論是，舊有力量不再『反映』人民利益，沒有回應他們的焦慮和恐懼。」問題咁複雜，故此社會上不時會發生「民意」衝擊公共機構嘅問題，令啲企業傳訊經理大為頭痛。