今屆德甲西甲冠軍已經塵埃落定，不過意甲同法甲經過周中一輪聯賽之後，邊一隊最後勝利都仲有價講。禮拜三意甲真係好睇過戲，祖雲達斯門神保方今鋪保唔住後方，送分畀萊切搞到得番1分領先優勢。呢邊費倫天拿仲激，教練迪利奧羅斯發狂打自己球員。隊波差唔多上岸，但羅斯就先收檔被炒魷魚。
AC攞3分爭標有價講
祖雲達斯喺呢場波賽前連贏8場聯賽，再贏兩場就可以確定封王，喺主場對住護級分子萊切點計都唔會失拖。事實上，萊切成場波都冇乜機會，去到84分鐘祖記都仲領先緊1:0兼踢多一個，點知門將保方接應巴沙利嘅回傳竟然控甩腳，畀萊切嘅貝圖拉斯搶到之後射入，就係咁痛失兩分。
祖記失分，另一邊AC米蘭就爭氣攞晒3分。A米主場迎戰阿特蘭大由蒙達利9分鐘先開紀錄，不過一直都拉開唔到領先優勢。球會副主席加利安尼原本打算一路唔畀球員知道祖記另一邊嘅賽果，但佢眼見對方失波，就決定喺大屏幕播出祖記1:1賽果。唔知係咪因為咁而令到A米士氣大振，羅賓奴喺完場前入波奠定勝局。A米全取3分之後家只係落後祖記1分，今季剩番兩輪聯賽，對球迷嚟講仲有競爭點都算係好事，星期日米蘭打吡戰A米肯定會搏老命。
費倫教練打拿積被炒
榜首之爭峯迴路轉，下游護級戰一樣有嘢睇。費倫天拿主場迎戰路華拿，喺一度落後兩球嘅情況下連入兩球扳平，令對方確定降班之餘，費倫只要再攞1分就可以成功護級。不過，場波上半場發生暴力事件，教練迪利奧羅斯對費倫開波之後表現極為唔滿意，32分鐘就決定換人，將90後中場拿積換走。咁樣落面法，少不更事嘅拿積自然沉唔住氣，喺後備席拍手掌嚟寸羅斯。點知羅斯仲好火，轉身指住拿積之後就㩒低佢起勢係咁打，旁邊嘅職球員都拉唔住。
費倫球會喺賽後宣佈會將羅斯解僱，由球會經理古連尼接任教到季尾，羅斯亦都會遲啲出嚟公開道歉。羅斯已經係今季意甲第18位被炒教練，睇嚟呢份工喺意大利都係難撈。
同場加映
