「簡直離晒譜，等咗成個鐘！」去年盈利創新高的港鐵，也令乘客「民怨」創新高。昨晨十多萬乘客被玩殘，各車站逼爆趕上班的乘客，即使上了列車也「行吓停吓」、慢過踩單車，加上安排混亂，錦上路站月台一度擠滿過千乘客，齊聲鬧爆港鐵。
南昌站沒廣播 乘客鬧爆
被指沒廣播事故的南昌站，當時月台電子牌還亮出列車埋站時間，候車乘客一直蒙在鼓裏，呆等半小時才知發生故障，大批乘客鼓譟，「等咗咁耐先話冇車搭，有冇搞錯？」
月台上聚集最多乘客的錦上路站，最為群情洶湧，「入咗閘上晒車先講故障，早啲通知咪唔使人入嚟啦；成車人聽得清清楚楚，你仲喺度撐！」一名男子向月台上的港鐵職員咆哮。
任職護士的古小姐表示，搭西鐵出尖沙嘴，列車停了至少半小時，「行吓停吓，列車一埋站，月台上嘅人就一齊湧上嚟，好混亂」。乘客鄭先生表示，由天水圍出尖沙嘴，結果遲大到，「喺大欖管道等咗好耐，停咗45分鐘，急尿到死，又落唔到車，真係俾佢玩死」。 《蘋果》記者