美聯集團（1200）早前爆發兵變，轟動地產界，耍太極耍到出晒位嘅前副主席黃錦康更加被指係幕後黑手。「太極黃」噚日終於企出嚟回應，。
已經同美聯冇任何關係嘅黃錦康，噚日着住招牌金黃色太極戰衣，喺中環主場（佢開咗12年嘅顧問公司）搞記招。長達120分鐘嘅記者會，黃錦康嘅開場白係：「今次搵大家嚟，唔係爆大鑊，冇鑊爆（你哋）一定失望。」
當天身在醫院
對於不幸事件接連發生喺佢身上，包括佢媽媽、前妻同阿仔先後離佢而去，黃錦康話仍然撐下去。患上自閉症嘅囝囝，兩年前確診腦癌，早前「醫生話佢得番一至兩個月命」，黃錦康於是休假，陪兒子走埋人生最後一程。
但講到美聯2月爆發嘅兵變，就越講越扯火。「『兵變』當日，我個仔瞓喺醫院，我喺醫院陪住佢，兵乜變，離晒譜……」重申唔關佢事，點解要話佢係幕後黑手，仲誓要向造謠者保留所有法律責任。黃錦康強調聲譽好重要，「人人以為我搞兵變，逼宮，咁我以後仲點出嚟搵食？」離開美聯後，黃錦後繼續搞顧問公司，操番fit啲太極。黃錦康持有1%美聯股份，話會以股東身份監察美聯。