星期二亞冠盃H組分組賽，FC廣州（恒大）主場迎戰全北汽車，原本贏波就可能確定出線16強，開波9分鐘就先開紀錄諗住穩陣搞掂，點知被扳平之餘到最後補時階段再連失兩球輸埋，爆出3.95倍冷W。場波點睇恒大都唔似係博老命想贏，呢隊波認真難估。
我求大俠波癮大，前日就同一班行家專程北上撐恒大提早出線16強。由於5.1黃金周效應，北上車飛緊張，為咗避過「勞動人口」，我哋被迫提早起行，開波前約5粒鐘已抵達廣州。但估唔到嘅係開波前1、2個鐘，已有唔少身穿主隊紅色波衫嘅球迷喺球場聚集，無論係街邊賣30蚊人仔嘅山寨版球衣，定係場外賣官方產品嘅店舖都人頭湧湧；入到球場更是一片紅海，近40,000名主隊粉絲全程又唱又跳，同10隻手指數得晒嘅全北汽車球迷形成強烈對比。
恒大踢多個仍不思進取
不過踢波唔係人多就大晒，恒大大部份時間人多恰人少，但成隊波踢到好似唔想贏咁。當下半場中段兩隊仲係1:1平手，韓籍教練李章洙突然將王牌達里奧干卡換走，連佢自己好似都唔係好信，一路搖住頭咁走，去到場邊仲怒踢水樽。全北冇耐之後有趙星恒領紅，不過恒大踢多一個唔搶攻不特止，仲要有成6個球員留喺自己後場搓波。最詭異嘅係李章洙除咗被對手反先2:1後有啲激動外，全場表現冷靜，所以盛傳球隊有意由前意大利主帥納比，頂佢個位都唔係無可能。
破中超轉會費簽巴里奧斯
恒大今季劍指亞冠盃開出天價贏波獎金，睇佢哋喺分組賽首戰5:1作客大勝全北汽車，球員分成1,600萬人仔。之不過之後喺分組賽應贏唔贏，先喺主場輸畀武里南聯，到禮拜二又再喺地頭爆冷輸波，總之就係蠱蠱惑惑。恒大要出線，喺煞科戰就唔可以輸波，和波嘅話就要求神拜佛另一邊柏雷素爾唔好贏全北汽車。
另外，恒大噚日宣佈，以破中超球會轉會費紀錄850萬歐元（約8,700萬港元），由德甲多蒙特簽咗前鋒巴里奧斯（右圖左），大約會喺一個月後報到。恒大如晉級仲一路殺入8強嘅話，呢位巴拉圭27歲射手就有資格喺8強代表恒大出戰亞冠盃喇。
